Шүүхийн шийдвэр гүйцэтгэх ерөнхий газрын харьяа 417 дугаар ангийн дарга асан, хурандаа согтуурсан үедээ тус ангийн байрлалд очиж, алба хаагчдыг буугаар сүрдүүлэн, хий буудсан талаар зарим хэвлэл мэдээллийн байгууллага мэдээлсэн.
Энэ талаар Шүүхийн шийдвэр гүйцэтгэх ерөнхий газрын Хэвлэл мэдээллийн төвийн дарга, хошууч Х.Баясгалангаас тодруулахад, “Энэ асуудал өнгөрсөн амралтын өдөр болсон. Гэхдээ зарим хэвлэл мэдээллийн байгууллагын мэдээлсэн шиг ангийн байрлалд болсон зүйл биш. Хувийн таарамжгүй харилцааны улмаас ахуйн хүрээнд болсон асуудал. Тухайн алба хаагч Н нь өөр ангид хуяглан хүргэлтийн байцаагчаар ажилладаг байсан бөгөөд тухайн алба хаагчийн гаргасан ёс зүйн үйлдэлтэй холбоотой асуудлыг Шүүхийн шийдвэр гүйцэтгэх ерөнхий газрын Хяналт шалгалт, аюулгүй байдлын газраас дотоод хяналт шалгалтын ажиллагаа явуулж 2023 оны 04 дүгээр сарын 24-ний өдөр үүрэгт ажлаас нь дутагдлаар халсан. Мөн уг асуудлыг Төв аймгийн Цагдаагийн байгууллагаас шалгаж байгаа болно.” гэв.
