Мөнх бусын орчлон Мөнхбат аваргын суудал эзгүйрч ханхайгаад дөрвөн жил болжээ. Эр бор харцага энэхэн замбуудаа элин халин нисч одсон ч суу алдар нь мөнх дуурсагдах нь юутай сайхан гайхам юм бэ.
Төв аймаг байгуулагдсаны түүхт 100 жилийн ойг тохиолдуулан Монгол Улсын Хөдөлмөрийн баатар, Даяар дуурсагдах далай аварга, Олимпийн мөнгөн медальт, гавьяат тамирчин Жигжидийн Мөнхбатын алдр гавьяаг дурсаж, хөшөө дурсгалыг нь аймгийн төв болох Зуунмод хотноо сүндэрлүүлж мөнхжүүлэх шийдвэр гаргасан байсан.
Тэгвэл өчигдөр буюу Зуны тэргүүн сарын шинийн 3-ны Балжиннямтай билигт сайн өдөр домогт аваргын дурсгалд зориулсан хөшөөний шав тавих ёслолын арга хэмжээ болов.Арга хэмжээнд аваргын ар гэрийнхэн үр хүүхэд, ах дүү болон аймгийн БТСГ-ын хамт олны төлөөлөл оролцсон байна.
