Ц.Оюунгэрэл:
АЙЛЫН ХҮҮХДҮҮДИЙГ ДАНДАА АЛАГ ҮЗДЭГ БОЛОХООР НЬ МАН-д БИ ДУРГУЙ (ЗАЛУУСТАА ЗОРИУЛАВ).
1. 22-хон настай залуу нисгэгчийг ээлжийн амралтаа авсан байхад нь заавал одоо нис гэж олон хоногийн борооны үүлтэй нутаг руу нисгэж, осолдуулчихаад, хэдхэн сартай хүүхдээ тэвэрч үлдсэн эхнэрийг нь оршуулгын үеэр цагдаа, прокурор, НАХЯ-ыхнаар гэрээс нь гаргахгүй, дарамтлан, сахиж байгаад “гомдолгүй” гэж гарын үсэг зуруулсан даруйдаа ослын газар дээр ямар ч үзлэг хийгдээгүй байхад МАН-ыхаа “Үнэн” сонин дээр “нисгэгчийн буруу” гэж улс даяар шившиглэсэн болохоор би дургүй.
2. Өрсөлдөгч компани нь босоод ирэхээр хамтрагчийнхаа бизнесийг авч үлдэхийн тулд гэмгүй залуусыг гүтгэж, шоронд хийсэн Ерөнхий сайдаар удирдуулсан нам болохоор би дургүй.
3. Өрсөлдөгчөө дарахын тулд зүсэн зүйлээр гүтгэхийг юман чинээ тоодогггүй бөгөөд түүнийхээ хажуугаар үй олон хүнийг давхар хэлмэгдүүлэн амь нас, алдар нэр, ар гэр, үр хүүхдийх нь амьдралаар тоглодог заваан соёлоосоо өнөөг хүртэл салаагүй учраас би дургүй.
4. 100 хүүхэд байхад та нарт өгөх илүүдээ гарсан мөнгө байхгүй гэж 9-ийг нь гадуурхах мөртөө өөрсдөө нүүрснээс 44 их наяд, ковидоос 11.5 их наядаар иддэг учраас би дургүй.
5. Ковидын үед жирийн иргэн эмнэлгийн тусламж авч чадахгүй шалган нэвтрүүлэх товчоон дээр, насанд хүрээгүй охин уух ус гуйж байгаад эмнэлгийн өрөөнд амь тавьж байх үед дарга нар, гэр бүлээрээ дуртай үедээ эмнэлэг рүү орж гаран, ямар үйлчилгээ авахаа өөрсдөө сонгож байсан учраас би дургүй.
6. Олон сараар ухаан алдаж унатлаа ажиллаж байсан эмнэлгийн ажилтангуудыг цалингаа нэмүүлье гэхэд “Улс эх орноосоо урвасан” гэж цоллож байсан дарга нар өөрсдийгөө хэдэн зуун сая, тэрбумаар урамшуулж, бие биедээ цол хэргэм хайрлаж байсан учраас би дургүй.
Ийм учраас би ирээдүйг авчрах өөрийнхөө хүү, охины үе чацуу залуусын төлөө айдас хүйдэсгүй тэмцээд байгаа юм.
Ийм учраас би “баас хатавч өмхийгөө тавьдаггүй” гэдэг шиг огт өөрчлөгдөггүй МАН-ын эсрэг дуугараад байгаа юм. Тэдний хэлсэн болгонд хууран мэхлэлт, ялгаравлан гадуурхалт, хүнийг хүн гэж үздэггүй байдал нь нэвт шингэсэн байдаг.
Ийм учраас би хулгайч, худалчууд бидний амьдралыг зааж зурж, зохицуулж болохгүй гээд байгаа юм.
Харин үүргээ гүйцэтгэж яваад амиа алдсан нисгэгчийн хүүтэй гэрээгээ цуцалсан гэж ИНЕГ-т дургүйцэж байгаагүй ээ. Сургалтын төлбөрийн 100% тэтгэлэг олгосон Америкийн их сургуулийн тавьсан шаардлагын дагуу ном, эрүүл мэндийн даатгалын мөнгийг ажилгүй байсан надад олох үнэхээр хэцүү байсан тэр үед тусалсан учраас, бас миний талийгаач тэнгэрт дүүлэн нисэж байхдаа аз жаргалтай байсан учраас би нисэхийнхэнд баярлаж, хүндэлж явдаг юм. Намайг онгоцныхоо бүхээгэнд оруулж ирээд өмнөө цэлийх тэнгэрийг харуулаад инээж байхад нь нисгэгч хүний жаргалыг ойлгож билээ.
