Монголын улс төрийн намууд үеийн үед дотооддоо хагаралтай байсан. Ардчилсан намынхан дотор, гадна ил үзэлцдэг бол МАН-ынхан тогоон дотроо сэмээрхэн үзэлцдэг. Харин энэхүү “тулаанд” намын залуу гишүүд хөлд гишгэгдэх нь элбэг. Үүний тод жишээ Д.Гантулга, Н.Номтойбаяр нар юм.
Тэд хоёул хоёулаа УИХ-ын гишүүн байсан ч намын ах нарын бүлгүүдийн золиос болсон. Өнөөдрийг хүртэл тэд хэлээ хазсан мэт дуугүй байсан. Харин саяхнаасаа тэд “хэлд орж” сошиал хуудастаа байр сууриа илэрхийлэх болжээ.
Тухайлбал Д.Гантулга ҮХНӨ, УИХ-ын гишүүдийн тоог 152 болгохгүй бол үр дүнгүй гэх асуудалд “Юу үнэн тэр үнэн. Тэгвэл больсон нь дээр. Цөөн хэддээ дарлуулаад, бүлэг фракцууд нь зодолдоод дундын хэдийгээ золиослоод л байж байг. Иргэд нэмэх, хасахын чухал нь юуг тэр бүр мэдэхгүй. Өнөөдрөөс илүү дээр өөрчлөлтийг л хүсэж байгаа. Заримдаа ч дугармаар санагдахын” гэсэн нь олны анхаарлыг татлаа.
Бүлэг фракцын зодооныг жинхэнэ утгаар нь мэдэрсэн тэрээр эргэн эрэлт хийж буй бололтой.
