Р.Эмүжин:Дал нуруундаа давхар нийгэм үүрсэн 70-аад оныхныг тайван байлгаарай

Сүлжээ дэлгүүрт худалдагч эмэгтэй хэл амаар доромжилсон Нямаа гэгч эмэгтэйгээс болж хүмүүс бухимдалтай байна. Гэвч тухайн танхай этгээдийн нас он нэлээд анхаарал татаж байгаа бололтой. 1980-аад оных гэсэн мэдээлэл гарсан ч тэрбээр 1970-аад оных байжээ. Нас хүйс онтой нь холбоотой хүн бүр үг үзэл бодлоо илэрхийлж байна.
Тухайлбал, эрх чөлөөт сэтгүүлч, яруу найрагч Р.Эмүжин 70-аад оныхны өмөөрчээ. Тэрбээр “Ингэхэд байна аа, дал нуруундаа давхар нийгэм үүрсэн 70-аад оныхныг тайван байлгаарай, тэр хүн чинь 80-аад оных гэсэн шүү! 50-аад оныхон тунирхаж ханахгүй, 60-аад оныхон ховдоглож ханахгүй, 80-аад оныхон эрхэлж ханахгүй, 90-ээд оныхон сурч ханахгүй, 2000-аад оныхон эморч ханахгүй байхад 70-аад оныхон л тэнгэрт далавчтай, газарт хумстай, усанд сэлүүртэй мэдүүү. Олон юм яриад байвал манай 70-аад оныхон зээлээ төлөхгүй гүрийгээд, татвараа өгөхгүй гэдийгээд, сургалтын төлбөрүүдийг чинь хийхгүй сураг алдраад, ер нь бол нийгэм хаялт зарлаад, шоудахгүй өнжихөд хошин шог хоосон, шоволзохгүй удахад сошиал хоосон, бүгдээрээ бүлтэлзээд, орон улсаараа орон гарангаа мартана шд. Манай үеийнхний нэр нүүрийг шавартай хутгаад байгаа шаналгаанууд нэг бол 60-аад он руу унаж, эсвэл 80, 90-ээд он өөд эртхэн ижлээ таниад нисээрэй, зүгээр” гэжээ.