Хэнтий нутгийн хүү хэнд ч дийлдэхгүй хүчтэн хэмээн нэг хэсэг шуугиж, шуугиулж явсан Улсын аварга Э.Оюунболд сэргээшийн шинжилгээнд бүдэрсэн билээ. 
Анх бүдрэхэд нь Улсын аварга цолыг нь хурааж авч, улсын арслан цолтон болгосон. Тэгвэл сэргээшийн шинжилгээнд бүдэрсэн Э.Оюунболд дахин 3 дахь удаагаа бүдэрчихээд байна.
Тэрбээр цагаан сарын барилдаанд барилдсан бөгөөд шинжилгээ авахад хориотой бодис илэрсэн нь хоёр удаагийн шинжилгээгээр баталгаажсан. МҮБХ-ны Ерөнхийлөгч Ц.Магалжав ч олон нийтэд хариуцлагатайгаар нэрийг нь зарласан байгаа юм. Тэгвэл анх шинжилгээний хариу нь эерэг гарсныг Э.Оюунболдод хэлсэн боловч тэрбээр ирээгүй, эргэж холбоо бариагүй алга болжээ. Тэр ч бүү хэл шинжилгээ өгөх үедээ өгсөн гэрийн хаягаа хүртэл өөрчилж, ор сураггүй алга болжээ. Гэрт нь гурван удаа очсон ч байгаагүй, хүн гарч ирээгүй гэдэг.
Тэгвэл үнэнд гүйцэгдэнэ гэгчээр Э.Оюунболдын сэргээш хэрэглэсэн асуудал даравч далдайж, булавч бултайж байна даа. Монголын үндэсний бөх өв соёлоо, бөх сонирхогч олон түмнээ Э.Оюунболд ингэж доромжилж, ингэж дэвсэлж гишгэлж болохгүй дээ.
