Өнөөдөр олноо “сахал” нэрээрээ танигдсан Д.Эрдэнэбилэгийн цагдан хорих эсэхийг хэлэлцэх шүүх хурал болох гэж байна. Тодруулбал, Нийслэлийн прокуророос Сүхбаатар дүүргийн эрүүгийн хэргийн анхан шатны шүүхэд яллагдагч Д.Эрдэнэбилэгийн хил давахдаа байршуулсан гурван тэрбум төгрөгийн барьцааг улсын орлого болгож, цагдан хорих буюу хүндрүүлэх нөхцлөөр шүүхэд шилжүүлжээ. 
Өөрөөр хэлбэл Д.Эрдэнэбилэг нь 2023 оны 02-р сард Сингапур улсад 14 хоногийн хугацаатай эмчилгээнд явах хүсэлт гаргасан ч эргэн ирэлгүй 6 сар болсон байна. Шүүх хурал өчигдөр болох байсан ч шүүхийн танхим хүрэлцээгүйн улмаас, ар араасаа орсон цагдан хорионы хурлууд дуусахгүй байсаар ажлын цаг дууссан тул өнөөдөр буюу 2023.08.18-нд 16:00 цагт Сүхбаатар дүүргийн эрүүгийн хэргийн анхан шатны шүүхэд болох юм.
Д.Эрдэнэбилэг өдгөө Монгол улсад ирээгүй байгаа. Гэсэн ч цагдан хохионы хурал түүнгүйгээр болох юм. Хэрвээ шүүхээс түүнийг цагдан хорих шийдвэр гарах юм бол эх орондоо орж ирэхэд нь шууд баривчлан саатуулах хуулийн зохицуулалттай.
2023 оны 2 дугаар сарын 9-нд Д.Эрдэнэбилэгийн өмгөөлөгч 14 хоногийн хугацаанд Сингапур улсад эмчлүүлэх шаардлагатай учраас хилийн хоригийг цуцалж өгнө үү гэх хүсэлт гаргасны дагуу шүүх хүсэлтийг хангаж шийдвэрлэсэн байдаг. Харин Засгийн газрын итгэмжлэгдсэн төлөөлөгч нарын зүгээс Эрдэнэтийн 49 хувийн хэрэгт 4 их наядын хохиролтой, Дарханы төмөрлөгийн үйлдвэрийн хэрэгт 2.8 их наяд, Цемент шохойн үйлдвэрт 3 тэрбум төгрөгийн хохиролтой буюу нийт 7 их наяд төгрөгийн хохиролтой хэрэг дээр шалгагдаж буй Д.Эрдэнэбилэгийг хилээр гаргасан нь шүүхийн үйл ажиллагаа хуулийн дагуу хийгдээгүй байна гэж хардахад хүргэж байгаа учраас АТГ-д хүсэлт гаргаж байгаа талаараа мэдээлсэн байдаг.
Д.Эрдэнэбилэг нарын 21 оролцогч, 2 хуулийн этгээдийг Эрдэнэт үйлдвэр ТӨҮГ-ын 49 хувь, Дарханы төмөрлөгийн үйлдвэр ХХК, Цемент шохой ХК-ийн хууль бусаар хувьчлан, улсад ДОЛООН ИХ НАЯД төгрөгийн хохирол учруулсантай холбоотойгоор АТГ-аас шалгаж байгаа юм.
Бид цагдан хорионы хурлын талаар эргэж мэдээлэх болно.
