Сүүлийн өдрүүдэд олны анхааралд байгаа 12 настай охин сураггүй болж, эцэст нь амиа алдаж, цогцос нь хээрээс олдсон дуулиантай холбоотойгоор Хүний эрхийн үндэсний комисс гэдэг байгууллага юу хийв. Яагаад таг дуугүй байна вэ. Хохирогч охины, түүний гэр бүлийн талаар элдэв мэдээлэл гарч хохирсон дээрээ нэмж хохироод байхад ус балгасан мэт дуугүй сууна. Тэгсэн атлаа хоригдол, ялтан, яллагдагч нарын гомдлыг хангаж элдэв байдлаар хууль сахиулах, шүүхийн шийдвэр гүйцэтгэх байгууллагыг “дарамтлах”-даа тун чиг сайн.
ХЭҮК бол үеийн үед л хоригдогч, ялтны эрхийг хамгаалахад л анхаарлаа хандуулж, тэдний гомдол, хүсэлтийг л хангаж, хохирсон хүмүүсийн эрхийг дурсдаг ч үгүй байгууллага байсаар ирсэн. Уг нь бол бага насны хүүхдийн хүчирхийлэл, хөгжлийн бэрхшээлтэй хүн, өндөр настны эрхийг хамгаалахад түлхүү дуу хоолойгоо гаргадаг байх ёстой санагдана.
Хамгийн сүүлд л гэхэд “Нүүрсний” гэх хэргийн яллагдагч, “Эрдэнэс Тавантолгой” ХК-ийн гүйцэтгэх захирал асан Б.Ганхуягийн гомдлоор Чингэлтэй дүүргийн Эрүүгийн хэргийн анхан шатны шүүхийнхнээс элдэв бичиг цаас нэхэж байгаа юм билээ. Өнөөх “нүүрсчин” нь Хоригдогчийн эрхийн үндэсний комисс руу “үндэслэлгүй хорилоо” гэсэн утгатай гомдол гаргасан юм даг уу даа. Түүнийх нь дагуу шүүхээс баримт нэхэж, Шүүх, шүүгчийн хараат бус байдалд халдаад байгаа юм билээ.
