Авьяаслаг жүжигчин Р.Анхням дэлгэцийн олон дүрийг чадварлаг бүтээж олон түмэнд хайрлагдаж ирсэн. 
Тэрээр цахим хуудаснаа “Энэ цаг үед хүүхдээ эрүүл саруул өсгөх гэж хичээж яваа надад байнга үүсдэг нэг асуудал байна. Юмны учир ойлгодог болтол нь өдөр бүр хичээх, тэмцэх хэрэгтэй болж байна. Ямар ч баяр болсон хүүхдүүдэд бэлэг гээд заавал чихэр өгөх юм. Дэлгүүр ороод лангууг нь харахаар ихэнх нь чихэр. Баяр гээд зарагдахгүй байгаа чихэр ундаагаа бүр багцалж боогоод зарна. Энэ нь миний нүдэнд багцалж боосон хор шиг л харагддаг.Бүр санаатайгаар хүүхдүүдийг хордуулж хорлож устгахаар шийдсэн юм шиг санагддаг. Аргагүй дээ. Өдөр бүр тэмцэж байгаа хүн бараг сэтгэцтэй болж байгаа байх. Арай гээд л долоо хоногт 1 чихрийн өдөртэй болгож хэвшүүлээд баахан кино зураг үзүүлээд, шүдний эмчээр яриулаад багштай нь ярилцаад байж болох суу залиа хэрэглээд явж байтал нэг айлд очдог ч юм уу эсвэл хаа нэг газар нэг нь чихэр атгаад өгчих юм. Нэг эгчид манай хүүхэд чихэр иддэггүй юмаа битгий өг гэж хэлээд маягтай ааштайгаараа дуудуулаад жаал загнуулах жишээний Хэдэн хүүхдээ чирээд л хөдөө гарч аяга тараг сүү уулгах гээд явахаар тэнд очиж байгаа айлчин гийчин маань бас чихэр чипс тараачих юм. Би бол хүүхдэд мөнгө өгөөд хадгаламждаа хийгээрэй миний дүү гэж хэлэхийг хэвшил болгоод овоо хэдэн жил болж байна. Хуучин цагт чихэр аваарай гэдэг байсан цаг өнгөрсөн шүү дээ. Тэр үед чинь юм ховор живэр байсан одоо бол юу л байна чихэр байна. Бас нууцаар амттан авч өгдөг эмээ өвөө нар анхаарах хэрэгтэй байна.За энэ бүгдийн эцэст юу гэж хэлэх гээд байна вэ гэвэл:
Хүүхдэд чихэр бэлэглэхээ болъё. Чихрээс өөр өгөх юм зөндөө бий. Хүүхдээ чихэр, ундаа гээд сахартай зүйлсээс хол байлгах гэж хичээж байгаа олон ээжүүд байгаа. Тэд нартаа дэм болоорой.Жижиг хүүхдэд сахар ихтэй идэх юм өгч байгаа нь өвчин бэлэглэж байгаатай утга нэг юм шүү” гэжээ.
