Биеийн тамир спортын улсын хороо нь хөгжлийн чиг хандлага, хүн амын хэрэгцээнд нийцүүлэн биеийн тамир, спортын салбарын бодлогын үр нөлөөг дээшлүүлэн олон талт, тэгш, хүртээмжтэй, чанартай үйлчилгээг хэрэгжүүлэх замаар бие бялдрын боловсролтой, ёс суртахууны төлөвшилтэй, эрүүл чийрэг иргэнийг төлөвшүүлэх зорилготой байгууллага. Харамсалтай нь тус байгууллагад мэргэжлийн боловсон хүчин дутагдалтай, дарга нь удирдлагаар хангаж чаддаггүй, хамаатан саднуудаараа ажилладаг “цус ойртсон”, хүний гарын үсэг дуурайж зурдаг, ажлын байран дээрээ архидан согтуурдаг, спортын наадам арга хэмжээ бүрээс мөнгө “иддэг” зэрэг олон алдаа зөрчил бугшсан газар болжээ. Тэгвэл энэхүү будлианы эхлэл болгож тус байгууллагад өнөөдөр өрнөж буй будлиануудыг цувралаар хүргэж байна.
Бид эхний цувралаараа тус газрын ерөнхий төсвийн мэдээлэл болон төсвийн мөнгийг хэрхэн үр ашиггүй зарцуулж байгааг, хоёр дахь цувралаар тус байгууллага дахь садан төрлийн холбоог, гуравдугаар цувралаар тус байгууллагын ажилчдын бараг тал хувь нь ногоон пасспорт авсан талаар хүргэсэн. Тэгвэл энэ удаад тус байгууллага дахь хурган дарга хэрхэн дураараа дургиж, танхайрч байгааг хүргэхээр бэлтгэлээ.
Биеийн тамир, спортын улсын хорооны Бодлого төлөвлөлтийн газрын даргаар О.Гэрэл гэгч ажилладаг. Гэхдээ тэрбээр дийлдэхгүй агсам согтуу тавьдаг нэгэн бөгөөд үүний баталгаа нь дараах бичлэг юм.
https://www.facebook.com/reel/371596679310135
Энэ бичлэг бол 2022.09.15-ны өдрийн 21 цагийн үеийн бичлэг бөгөөд тэрбээр хагалсан соронзон түгжээ бүхий шилэн хаалттай хаалгаа маргааш өглөө нь гэхэд шиллэсэн байсан түүхтэй.
Тэрбээр согтууруулах ундааны зүйл хэрэглэсэн үедээ ажлын байрандаа танхайрч, байгууллагын эд хогшил эвдэн сүйтгэхийн зэрэгцээ өөрөөсөө ахмад настай хамгаалалтын ажилтны биед халдсан үйлдэлдээ зөрчлийн тухай хуулйн 5.3 дугаар зүйлийн 1 дэх хэсэг, 8.8 дугаар зүйлйн нэг дэх хэсэгт тус тус заасны дагуу нийт гурван зуун нэгжтэй тэнцэх хэмжээний төгрөгөөр торгох шийтгэл оногдуулсан байна.
Гэвч түүний энэхүү үйлдэлд БТСУХ-ны Ёс зүйн дэд хороо нь хариуцлага хүлээлгэлгүй орхисон түүхтэй. Тиймээс тухайн үеийн БТСУХ-ны дарга Д.Жаргалсайхан ажлаас нь чөлөөлжээ.
Гэвч О.Гэрэл нь шүүхээр заргалдаад эргээд ажилдаа орсон байх юм.
Асуудлын гол нь өдгөө энэ хүн ажлаа сайн хийж байгаа бол шүүмжлэхгүй. Тэрбээр тамирчин, дасгалжуулагч, эмч нартай барьцан БТУСХ-ны зардлаар ОЛИМП руу 2024.08.04-ны өдөр явсан байх юм. Уг нь тэрбээр олимп руу явах ямар ч хэрэгцээ шаардлага байхгүй.
Үүнээс гадна тэрбээр өдгөө эхнэртэйгээ нэг байгууллагад ажиллаж байгаа. Түүний эхнэр нь БТСУХ-ны Гадаад харилцаа, мэдээллийн технологийн хэлтсийн дарга Н.Оюунбат. Нэг бүлийн хоёр хүн хурган дарга хийж байгаа нь ашиг сонирхлын зөрчил үүсэх эрсдэлтэйн дээр Төрийн албаны тухай хууль, Авлигын эсрэг, Нийтийн албанд нийтийн болон ашиг сонирхлыг зохицуулах, ашиг сонирхлын зөрчлөөс урьдчилан сэргийлах тухай хуулийг тус тус зөрчиж байгааг албан эх сурвалж баталдаг.
Ашиг сонирхлын зөрчилтэй, татвар төлөгчийн мөнгөөр олимп үзэн “тансаглаж” байгаа тэрбээр сахилгын шийтгэлтэй хэрнээ Хөдөлмөрийн гавьяаны улаан тугийн одонгоор шагнуулан мандаж явна.
Төрийн албаны зөвлөлөөс энэ хүний талаар асуусан боловч хариу өгөөгүй юм.
Тиймээс салбарынн сайд Ч.Номин, Засгийн Засгийн газрын Хэрэг эрхлэх газрын дарга Н.Учрал, Төрийн албаны зөвлөл нь анхааралдаа авч энэ мэт дураараа дургиж буй хурган дарга нарт анхаарал хандуулан спортын салбарт хариуцлагын тогтолцооны жишгийг тогтоох шаардлага байгааг бид онцоллоо.
Бид дараагийн цувралаар тус байгууллагад өрнөж буй олон хууль бус үйлдлүүдийг ийнхүү баримттайгаар дэлгэсээр байх болно
А.Баярмаа
Холбоотой мэдээлэл:
Хариуцлагагүйн “зуд” нүүрэлсэн Биеийн тамир спортын улсын хороонд өрнөж буй будлиан №1
Хариуцлагагүйн “зуд” нүүрэлсэн Биеийн тамир спортын улсын хороонд өрнөж буй будлиан №2 Ургийн Мод
