Орон нутгийн удирдах албан тушаалтнууд үгсэн хуйвалдаж, Төрийн болон орон нутгийн өмчийн хөрөнгөөр бараа, ажил, үйлчилгээ худалдан авах нэрээр ойр тойрныхон, танил нөхдөдөө давуу байдал олгох явдал багагүй гардаг. АТГ-ын Мөрдөн шалгах хэлтсийнхэн ийм олон хэргийг шалгаж, яллах дүгнэлт үйлдүүлэхээр шүүхэд шилжүүлсээр байгаа юм. Хамгийн сүүлд Баянхонгор аймгийн Өлзийт сумын удирдах албан тушаалтнуудтай холбоотой хэргийг шалгаж дуусаад прокурорын байгууллагын хяналтад хүргүүлсэн аж. Тус сумын
Засаг дарга Т.Эрдэнэбат, Засаг даргын Тамгын газар (ЗДТГ)-ын дарга М.Зоригт нар албан тушаалаа урвуулж “Залаацагаан” хоршооныхон өөрсдийн хөрөнгөөр зассан, төрийн байгууллагуудыг дулаанаар хангадаг уурын зуухыг ашиглахыг зогсоохоор шийдвэрлэсэн байна. Улмаар шинээр уурын зуух бариулахаар сонгон шалгаруулалтыг хууль бусаар зохион байгуулж “Скэйл” ХХК-ийг шалгаруулан гэрээ байгуулж, эл компанийнханд давуу байдал бий болгосон хэрэгт холбогдсон аж.
Зургийн тайлбар: Баянхонгор аймгийн Өлзийт сумын Засаг дарга Т.Эрдэнэбат
Дээр дурдсан “тендер”-ийн хуулийг зөрчсөн Ховд аймгийн Буянт сумын удирдлагын хэрэгт мөн яллах дүгнэлт үйлдүүлэхээр болжээ. Тус сумын ЗДТГ-аас худаг гаргах ажлыг 15 сая төгрөгөөр төсөвлөн тендер зарлаж, 2021 оны есдүгээр сарын 8-нд “Алтайн газрын хүч” ХХК-тай гэрээ байгуулсан гэнэ. Улмаар 12 сая төгрөгийн өртөгт багтаан худаг гаргах, хамгаалах барилгын ажлыг хийлгэхээр болжээ. Уг ажлыг нэг сарын дараа хүлээн авахаар гэрээндээ тусгасан аж. Гэвч уг ажлыг хугацаанд нь хийгээгүй, өнөөг хүртэл худгийг ашиглалтад оруулаагүй юм байна. Аудитын байгууллагаас уг тендертэй холбоотой ажлуудыг шалгахад дөрвөн сая гаруй төгрөгийн ажил огт хийгээгүй нь тодорхой болжээ. Худаг гаргах, хамгаалах тендерт Буянт сумын ЗДТГ-ын дарга Ш.Даваатогтох үнэлгээний хорооны даргаар ажиллаж, сонгон шалгаруулалтад оролцон бусдад давуу байдал бий болгосон хэмээн буруутгагдаж буй аж.
