“Ард санхүүгийн нэгдэл”-ийн захирал Ч.Ганхуяг болон түүний дүү Б.Золбоо нар 2022 оны арванхоёрдугаар сард эмэгтэй хүн зодож гэмтэл учруулсан хэрэгт яллагдагчаар татагдан шалгагдаж байсан билээ.
Тэгвэл өнөөдөр тус хэрэгт холбогдох хэргийн шүүх хурал Сүхбаатар дүүргийн эрүүгийн хэргийн анхан шатны шүүхэд болж шүүхээс тэднийг гэм буруутайд тооцож торгуулийн ял оноолоо.
Тодруулбал, Нийслэлийн Сүхбаатар дүүргийн Прокурорын газраас Ч.Ганхуяг, Б.Золбоо нарт холбогдуулан яллах дүгнэлт үйлдэж ирүүлсэн хэргийг Сүхбаатар дүүргийн Эрүүгийн хэргийн анхан шатны шүүх 2024 оны 10 дугаар сарын 09-ний өдөр хянан хэлэлцээд шүүгдэгч Ч.Ганхуягийг хүний эрүүл мэндэд хөнгөн хохирол санаатай учруулах гэмт хэргийг үйлдсэн гэм буруутайд тооцсон. Улмаар тус зүйл хэсэгт зааснаар 1350 нэгжтэй тэнцэх хэмжээний буюу 1 350 000 төгрөгийн торгуулийн ял, шүүгдэгч Б.Золбоог хүний эрүүл мэндэд хүндэвтэр хохирол санаатай учруулсан гэмт хэргийг үйлдсэн гэм буруутайд тооцож, тус зүйл хэсэгт зааснаар 4000 нэгжтэй тэнцэх хэмжээний буюу 4 000 000 төгрөгийн торгуулийн ял тус тус шийтгэж, шүүгдэгч Ч.Ганхуяг, Б.Золбоо нарт оногдуулсан торгуулийн ялыг шүүхийн шийтгэх тогтоол хуулийн хүчин төгөлдөр болсноос хойш 03 сарын хугацаанд хэсэгчлэн төлүүлэхээр тогтоож шийдвэрлэсэн байна.
Ч.Ганхуягтай хамт эмэгтэй хүн зодсон Б.Золбоо нь Тэнгисийн эрэг дээрх 24/7 шоуны панелист Г.Дүзиймаагийн нөхөр юм. Г.Дүзиймаа нь “Хас”-ын Ч.Ганхуягийн төрсөн ах Ч.Гантулгын охин юм. Өөрөөр хэлбэл хүргэн хүү, хадам ахтайгаа нийлж бусдыг зодсон хэрэгт ийнхүү ял авч байгаа нь энэ юм.
