Монголын үйлдвэрчний эвлэлийн холбоо болон түүний харьяа Монголын эрчим хүч, геологи, уул уурхайн Үйлдвэрчний эвлэлийн холбооны удирдлагууд болох Д.Долгор, Х.Буянжаргал тэргүүтэй удирдлагуудын 11 хүнийг албан тушаалаа урвуулан ашигласан хэрэгт яллагдагчаар татсан талаар эх сурвалжууд мэдээлсэн. Яллагдагчаар татагдсан 11 этгээдэд таслан сэргийлэх арга хэмжээг сар шинийн өмнө авсан бөгөөд хэрэгт голлох үүрэгтэй оролцсон гэгдэх Д.Долгор хилийн хориг тавиулж үүрэгт ажлаасаа тодорхойгүй хугацаагаар чөлөөлөгдсөн юм. Тэгвэл уг хэрэгт мөн голлох үүрэгтэй оролцож, улмаар салбар хорооноос МҮЭ-ийн ерөнхий нарийн бичгийн дарга болтлоо дэвшсэн Х.Буянжаргал мөн хилийн хориг тавиулжээ. Мөн түүнийг хэргийн оролцогчидтой уулзахыг хориглох шийдвэр Дүүргийн Эрүү, Иргэний хэргийн хялбар ажиллагааны анхан шатны тойргийн шүүхээс гаргасан байна.
Хэргийг эргэн сануулахад, МҮЭ-ийн ЭХГУУҮЭХ-ны үе үеийн удирдлагууд болох Б.Рагчаа хоёр сая, ерөнхий нарийн бичгийн дарга Х.Буянжаргал 197 сая, Д.Долгор 14 сая гэх зэрэг байдлаар цалингийн зээл нэрээр санхүүгийн анхан шатны баримтгүйгээр авсан аж. Түүнчлэн Сүхбаатар дүүргийн I хорооны нутаг дахь “Үйлдвэрчин” хотхоноос Х.Буянжаргал, Д.Долгор нар 1-3 өрөө байр авсан атлаа “орон сууцгүй” хэмээн 2021 онд дэмжлэг авсан байдаг. Уг хэргийг хоёр жилийн турш хуулийн байгууллагаас шалгаж байгаа юм.
Бид энэ хэргийн талаар болон МҮЭ-д өрнөж буй хууль бус байж болзошгүй үйлдлүүдийн талаа эргэж мэдээлсээр байх болно.
