2017 оны Ерөнхийлөгчийн сонгуулийн өмнө БНХАУ-ын хөрөнгө оруулалттай “Шинжиан шинфа” ХХК-д Төрийн банкнаас 20 тэрбум төгрөгийн зээл олгосон ерөнхий захирал асан Д.Баярсайханы албан тушаалаа урвуулсан хэрэгт хамтран оролцогч хэмээн хоёр жил хорих ял шийтгүүлсэн, уг зээлээ хугацаандаа төлөөгүй аж ахуйн нэгжийн удирдах албан тушаалтан Сүн Гуан Чен ДАХИН ЯЛ авлаа.
Тодруулбал, Сонгинохайрхан дүүргийн Татварын хэлтсээс “Шинжиан шинфа” ХХК-ийн 2017-2020 оны албан татварын ногдуулалт, төлөлтөд хяналт шалгалт хийж 3.8 тэрбум төгрөгийн татвар ногдох орлогыг нуун дарагдуулж, тайландаа тусгаагүйг илрүүлсэн байдаг. Татварын ерөнхий хуулийн дагуу татвар ногдох орлого, хүү, алдангийг нь нөхөн төлүүлж, тодорхой хэмжээний торгууль ногдуулах ёстой. Гэтэл “Шинжиан шинфа”-гийн захирал Сүн Гуан Чен зөрчлийн дүнг 119 сая болгон бууруулсан акт тогтоолгохын тулд татварын улсын байцаагч Ж.Энхжаргалд 400 орчим сая төгрөгтэй тэнцэх хэмжээний ам.долларыг хахууль болгон өгч, татвараас зайлсхийсэн гэх хэрэгт буруутгагдсан юм.
Тэднийг эрүүгийн хуулийн
22.4 дүгээр зүйл.Нийтийн албан тушаалтан хахууль авах
22.5 дугаар зүйл.Хахууль өгөх гэм хэрэгт буруутган шүүх хурал нь Баянгол, Хан-Уул, Сонгинохайрхан дүүргийн Эрүүгийн хэргийн анхан шатны тойргийн шүүхэд 2025.03.20-ны өдөр болсон байна.
Улмаар Сонгинохайрхан дүүргийн Татварын хэлтсийн ажилтан Ж.Энхжаргалд ХОЁР ЖИЛИЙН ХОРИХ ЯЛ, Сүн Гуан Ченд НЭГ ЖИЛ НАЙМАН САР ХОРИХ ЯЛ тус тус оноожээ.
Уг хэргийг өнгөрсөн долдугаар сарын 02-ны өдөр Сонгинохайрхан дүүргийн Эрүүгийн хэргийн анхан шатны шүүх хянан хэлэлцээд Сүн Гуан Ченд 14 сая төгрөгөөр торгох ял оноосон бол татварын байцаагчийг хоёр жил зургаан сарын хугацаагаар хорихоор шийдвэрийг гаргасан бол Нийслэлийн давж заалдах шатны шүүх тус хэргийг дахин хэлэлцүүлэхээр буцаасан юм. Харин Улсын дээд шүүх тус хэргийг хэлэлцэхээс татгалзсан тул тухайн хэргийг дахин анхан шатны шүүхээр хэлэлцэхээр болж уг хэргийг анхан шатны шүүхээр дахин хэлэлцсэн нь энэ юм.
Бид энэ хэргийн талаар эргэж мэдээлсээр байх болно.
