Яг одоо Багануур дүүргийн эрүүгийн хэргийн анхан шатны шүүхэд “Эрдэнэс Монгол”-ын харьяанд багтдаг “Багануур” ХК-ийн гүйцэтгэх захирал асан Э.Номинчулуун “Багануур”-ын Худалдаа, хангамжийн хэлтсийн дарга С.Батхишиг, тус хэлтсийн гэрээний мэргэжилтэн М.Ганбат, Санхүү, эдийн засгийн бодлогын хэлтсийн дарга Д.Болд, ерөнхий нягтлан бодогч П.Эрдэнээ, Технологи, автомашин засварын хэлтсийн ажилтан Т.Эрдэнэхүү, “Ожийхон бужаадаа” ХХК-ийн захирал Г.Нандинцэцэг, “Эко чандмань” ХХК-ийн захирал Д.Нарандорж, “Тайшир-ӨргӨӨ”, “Баянбогд Алтай” ХХК-ийн хамаарал бүхий этгээд болох Б.Бат-Эрдэнэ, “Монгол даатгал” ХК-ийн Багануур дүүрэг дэх салбарын захирал С.Ичинхорлоо, “Элбэг хэрлэн” ХХК-ийн захирал Б.Ганзориг, “Билгүүнмэйрэн” ХХК-ийн захирал Г.Даваасүрэн, “Юү би ти эй транс” ХХК-ийн эрх бүхий албан тушаалтан Ш.Буянням, “Мөнх хоёр эрдэнэ” ХХК-ийн удирдах албан тушаалтан Т.Мөнх-Эрдэнэ нарт холбогдох хэргийн шүүх хурал болж байна.
Э.Номинчулууныг хахууль өгсөн, авсан, албан тушаалаа урвуулж бусдад давуу байдал олгосон гэх үндэслэлээр шалгах явцад нэр дурдсан албан тушаалтнууд “Багануур” ХК-д сэлбэг, хэрэгсэл нийлүүлэх тендерт найз нөхөд, ах дүүсийнхээ аж ахуйн нэгжүүдийг шалгаруулж, мөнгө шамшигдуулж байсан нь тодорхой болсон билээ.
Түүнчлэн Э.Номинчулуун өөртэйгөө холбоотой сөрөг мэдээллүүдийг устгуулах зорилгоор “Нийслэлийн сэтгүүлчдийн нэгдсэн холбоо” ТББ-ын тэргүүн Б.Ганзоригт 32.8 сая төгрөгийн хахууль өгсөн, түүгээр дамжуулан 2022 оны гуравдугаар сарын 16-нд “Улс төрч агентлаг” (ulsturch.mn) ХХК, “Тэнгэр медиа пиар групп”, “Асу медиа видео сан” (asu.mn), “Виа бренд медиа” (tsahiur.mn), “Даам медиа” (daam.mn), “Вип зууч сэтгүүл”, “Зөв мэдээлэл холбоо” НҮТББ (zuv.mn), “Нью папараци медиа групп” (paparazzi.mn) ХХК-тай 200 сая төгрөгийн үнийн дүн бүхий гэрээ байгуулж, урьдчилгаа төлбөрийг нь шилжүүлсэн хэмээн буруутгасан аж.
Өмнө нь уг хэргийг Сүхбаатар дүүргийн эрүүгийн хэргийн анхан шатны шүүхээр хэлэлцээд Э.Номинчулууны албан тушаалаа урвуулсан үйлдэлд нь нэг жил гурван сар зорчих эрх хязгаарлах, хахууль авсан болон oгсoн хэрэгт нь тус бүр 27 сая тoгрoгooр торгох ял оноож, нийтийн албанд томилогдох эрхийг нь найман жил хасжээ. Мөн Д.Болдын албан тушаалаа урвуулсан үйлдэлд нь нэг жил зургаан сар зорчих эрх хасаж, хахууль авсан хэрэгт нь нийтийн албанд томилогдох эрхийг долоон жил хязгаарлан 10 сая тoгрoгooр торгов. Бас С.Батхишигийн хахууль авсан хэрэгт дээрх шүүгдэгчтэй ижил хугацаагаар тoрд ажиллах эрхийг хязгаарлан, 27 сая тoгрoгooр торгох ял шийтгэж, албан тушаалаа урвуулсан үйлдэлд нь адилхан хугацаагаар зорчих эрх хассан байна. Түүнчлэн П.Эрдэнээгийн албан тушаалаа урвуулсан үйлдэлд нь нэг жил хоёр сар зорчих эрх хязгаарласнаас гадна хахууль авсан хэрэгт нь долоон жил нийтийн албанд ажиллах эрхийг нь хасаж, 15 сая тoгрoгooр торгожээ. Бусад 10 шүүгдэгчид бас торгох ял оноосон байна. Энэ гэмт хэргийн улмаас олсон, “Багануур” ХК-д учруулсан 400-гаад сая төгрөгийг шүүгдэгч, иргэний хариуцагч нараас гаргуулахаар шийдвэрлэлээ. Өөрөөр хэлбэл, нэр дурдсан сэлбэг нийлүүлэгч компаниуд, Э.Номинчулууны үйлдлийг бичихгүй байхаар амлаж гэрээ байгуулж мөнгө авсан цахим хуудас эрхлэгч аж ахуйн нэгжүүдээс олсон орлогыг нь гаргуулахаар болсон юм. Харин Э.Номинчулуунаас хахууль авсан нэр бүхий цахим хуудсуудад зуучлан гэрээ байгуулсан хэрэгт яллагдагчаар татагдсан “Нийслэлийн сэтгүүлчдийн нэгдсэн холбоо” ТББ-ын тэргүүн Б.Ганзоригийн үйлдлийг НПГ-аас тусгаарлан шалгуулалгүй үлдсэн нэр бүхий сайтуудын эздийн хамт шүүхэд шилжүүлэхээр авч үлдсэн түүхтэй.
Гэвч хэргийг давж заалдах шатны шүүхээс анхан шатны шүүхээр хэлэлцүүлэхээр буцаасан. Хяналтын шатны шүүхээс уг хэргийг хэлэлцээгүй тул давж заалдах шатны шүүхийн шийдвэр хэвээр үлдсэн тул ийнхүү Багануур дүүргийн эрүүгийн хэргийн анхан шатны шүүхээр хэлэлцэж байгаа нь энэ юм.
