УИХ-ын гишүүн Ц.Анандбазар үе үе таагүй дуулианд өртдөг нэгэн. Энэ удаад түүнд Монгол улсын хууль ялгамжтай үйлчилдэг байж болзошгүй нөхцөл бүрдээд байна.
Тодруулбал, түүний эзэмшлийн “Өргөө-2” кино театр нь Мэдээлэл технологийн үндэсний паркад олон жилийн турш зах зээлийн ханшаас хэд дахин хямд үнээр буюу нэг мкв нь 8,000 төгрөгөөр түрээслэдэг байсан аж.
Түрээсийн гэрээнийи хугацаа дуусч, Мэдээлэл технологийн үндэсний парк талбайгаа чөлөөлөхийг хүсэхэд Ц.Анандбазарын эзэмшлийн байгууллага зөвшөөрөөгүй тул асуудлыг шүүхээр шийдвэрлэхээр болж анхан болон давж заалдах шатны шүүхээс Ц.Анандбазарыг МТҮП-аас түрээсэлсэн байраа чөлөөлж өгөх шийдвэр гарсан байдаг. Тодруулбал, МТҮП-аас өөрийн эзэмшлийн 2526 мкв талбайг хууль бусаар эзэмшиж байгааг зогсоож, суллаж өгөхийг шаардан, шүүхэд ханджээ. Хоёр ч шатны шүүхийн шийдвэрээр Ц.Анандбазарын Нью Тур Сафарис ХХК-ийн буруу хэмээн тогтоож, нэхэмжлэгч талын зөв хэмээн шийдвэрлэжээ.
Гэтэл шүүхийн шийдвэр гараад хоёр сарын хугацаа өнгөрөхөд Ц.Анандбазар МТҮП-ын талбайг чөлөөлж өгөх нь битгий хэл цахим тоглоомын газар болон мах шардаг газарт давхар түрээслэсэн байжээ. Тухайн газар нь засвар хийж, хаягаа хадан үйл ажиллагаагаа эхлүүлж, илтэд хууль зөрчиж байна.
Энэ мэт илтэд шүүхийн шийдвэр биелүүлэхгүй зөрчиж байгаад ШШГЕГ-аас хяналт тавихгүй, хөдлөхгүй байгаа нь юуных вэ?!
Эсвэл Монгол улсын хууль Ц.Анандбазарт өөрөөр үйлчлээд байна уу? Шүүхээс Шүүхийн шийдвэр гүйцэтгэх байгуулагад шийдвэр очих хүртлээ ингэж удаж байна уу?
Тэргүүн баяны аархал, УИХ-ын гишүүн асны хайнга үйлдэл үү?
