Архангай аймгийн Цагаан даваагаас уруудах замд дотоодын цэргийн алба хаагч өөд болсон хэрэг өнөөдөр (2025.11.20) гарлаа.
Тодруулбал, аюултай ачаа тээвэрлэж явсан тээврийн хэрэгсэл Архангай аймгийн Цагаан даваа уруудаж байгаад онхолдож нэг алба хаагч болон жолооч энгийн иргэний хамт газар дээрээ өөд болсон гэнэ. Өөд болсон алба хаагч нь ахлагч цолтой нэгэн байсан бөгөөд уг газарт дотоодын цэргээс хяналт, шалгалтын ажиллагаа явуулахаар Улаанбаатар хотоос ажлын хэсэг хөдөлсөн гэх мэдээлэл байна.
Бүгд Найрамдах Улс тунхаглаж, Үндсэн хуульт ёсоо тогтоосны 101 жилийн ойн баярыг тохиолдуулан шагнал, цол гардуулж буй энэ өдөр осол болсон нь Дотоодын цэргийн штабын дарга, бригадын генерал Р.Чингисийг буруутгах хүн цөөнгүй байна. Тиймээс Р.Чингисийг “Уг албан тушаалыг хаших үед жилд заавал нэг алба хаагч өөд болдог бичигдээгүй хуультай боллоо” хэмээн ярилцаж байна. Өөрөөр хэлбэл тэрбээр удирдлагаар хангаж ажиллаж чадахгүй байгаагаас дотоодын цэргийн алба хаагчид өөд болсоор байгааг цахим орчин дахь мэдээллүүд баталсаар байна.
Бид энэ хэргийн талаар албан эх сурвалжаас тодруулан эргэж мэдээлэх болно.
