Банкны данс, утасны дугаар, цахим хаягаа бусдад ашиглуулж, цахим мөрийтэй болон бооцоот тоглоом, төлбөрт тааварт ашиглуулах нь Эрүүгийн хуулийн 20.19-т зааснаар эрүүгийн хариуцлага хүлээлгэх үндэслэл болдог.
Энэ талаар Цагдаагийн ерөнхий газрын Урьдчилан сэргийлэх албаны ахлах мэргэжилтэн, цагдаагийн хошууч А.Итгэлт иргэд, олон нийтэд хандан сэрэмжлүүлэг мэдээлэл хүргэлээ.
– Мөрийтэй тоглоомтой холбоотой хуульд орсон нэмэлт, өөрчлөлтийн тухай энэ өөрчлөлтийн гол агуулга юу вэ?
-2025 оны 5 дугаар сарын 31-ний өдөр батлагдсан нэмэлт, өөрчлөлтөөр мөрийтэй тоглоом, бооцоот тоглоом, төлбөрт тааварт ашиглагдаж байгаа үүрэн телефоны дугаар, арилжааны банкны данс, мөн виртуал хөрөнгийн дансыг ашигласан тохиолдолд тухайн данс, дугаар, виртуал хөрөнгийн эзэмшигч өөрөө хуулийн хариуцлага хүлээх зохицуулалтыг тусгасан.
-Өөрөөр хэлбэл, өөрийн дансаар дамжуулсан гүйлгээнд хариуцлага хүлээнэ гэсэн үг үү?
– Тийм. Хэрэв таны арилжааны банкны дансаар орж, гарсан мөнгөн гүйлгээ нь мөрийтэй тоглоом, бооцоот тоглоом, төлбөрт таавартай холбоотой, гэмт хэргийн шинжтэй болох нь тогтоогдвол тухайн данс эзэмшигч өөрөө хуулийн хариуцлага хүлээнэ. “Би өөрөө тоглоогүй, зүгээр л дансаа ашиглуулсан” гэх тайлбар хүлээн зөвшөөрөгдөхгүй.
-Зарим иргэд дансаа түрээслүүлж, ашиглуулсны хариуд урамшуулал авдаг тохиолдол бий. Энэ талаар?
– Тийм тохиолдол цөөнгүй байна. Иргэд дансаа түрээслүүлж, мөнгөн гүйлгээ хийлгэснийхээ төлөө цалин, урамшуулал авдаг. Гэхдээ энэ нь бусад иргэдийг хохироож, гэмт хэргийн нэг хэсэг болж байгааг ойлгох хэрэгтэй. Банкны данс, утасны дугаар гэдэг нь таны хувийн мэдээлэл, хувийн өмч юм. Тиймээс хувийн өмчөө бусдад ашиглуулах, түрээслүүлэх нь өөрөө хуулийн эрсдэл дагуулдаг.
– Иргэдэд хандаж та ямар анхааруулга өгөх вэ?
-Иргэд өөрийн банкны данс, үүрэн телефоны дугаар, цахим болон виртуал хөрөнгийн дансаа бусдад ашиглуулахгүй байх нь хамгийн чухал. Хэрэв ийм байдлаар ашиглуулсан тохиолдолд та өөрөө хуулийн хариуцлага хүлээнэ. Иймд хялбар мөнгө, урамшуулалд хууртахгүй, хууль зөрчих эрсдэлээс өөрийгөө болон бусдыг хамгаалахыг уриалж байна.Мөн ийм төрлийн зөрчил, гэмт хэргийн талаар мэдээлэл авсан тохиолдолд цагдаагийн байгууллагад мэдээлж, хамтран ажиллахыг уриалж байна.
