Ардын хувьсгалын 104 жилийн ойн их баяр наадмын үзүүр бөх Онгон сумын харьяат Улсын гарди Н.Өсөхбаярын улсын гарди цолыг хурааж, барилдах эрхийг нь дөрвөн жилээр хасах тогтоол гаргаж өнгөрсөн оны аравдугаар сард Ерөнхийлөгчид хүргүүлсэн Үндэсний их баяр наадам зохион байгуулах хорооны тогтоол Ерөнхий сайдын хэлсэн алдаатай үгний дараахан ил болсон.
Ерөнхийлөгчид тогтоол хэрхсэн нь одоогоор тодорхой биш байна. Энэ зуурт улсын гарди Н.Өсөхбаярын зүгээс өөрт нь допингийн төрлийн бодис хэрэглүүлсэн гэх багшийг шалгуулахаар Эрүүгийн цагдаагийн газарт гомдол гаргаж шалгуулсан байна.
Энэ асуудлаар хүндийг өргөлтийн багш, гавьяат дасгалжуулагч хэргэмтэй этгээдэд хэрэг үүсгэж шалгалтын ажиллагаа явуулж дуусжээ. Нотлох баримтуудад шалгалтын ажиллагаа явуулахад Н.Өсөхбаярыг хорлосон байж болох нөхцөл байдал тогтоогдсон талаар эх сурвалж онцолж байна. Түүнд допингийн төрлийн бодис хэрэглүүлсэн гэх асуудалд буруутгагдаад буй гавьяат дасгалжуулагч өмнө нь допингийн төрлийн бодис хадгалсан, бусдад борлуулсан гэх үндэслэлээр Эрүүгийн цагдаагийн газрынханд баривчлагдаж байсан хүн юм. Түүнийг Монгол Улсад бүртгэлгүй эм худалдсан, хадгалсан гэх үндэслэлээр шалгаж байв. Үүссэн нөхцөл байдалтай холбоотойгоор Н.Өсөхбаяр эрхээ хамгаалахаар Үндэсний спортын арбитрт хандаад байгаа юм байна.
Н.Өсөхбаярын хувьд допингийн төрлийн бодисыг ямар нэгэн байдлаар биедээ оруулсан нь WADA буюу Дэлхийн допингийн эсрэг байгууллагын итгэмжлэгдсэн лабораторийн шинжилгээгээр тогтоогдсон. Хэн нэгэн түүнийг хорлосон байлаа ч Н.Өсөхбаяр улсын гарди цолоо хураалгах аж. Харин Допингийн эсрэг үндэсний дүрэмд тусгаснаар хэрэглүүлсэн хэн нэгнийг илчлээд энэ нь нотлогдсон тохиолдолд шийтгэлээ хөнгөлүүлдэг юм байна. Өөрөөр хэлбэл допингийн төрлийн бодис санал болгож хэрэглүүлсэн этгээдийг зааж өгөөд бага шийтгэл авдаг жишиг бий.
Үүнээс үзэхэд Н.Өсөхбаяр барилдах эрхээ дөрвөн жил биш нэг жилийн хугацаагаар хасуулж, аймгийн хурц арслан /Улсын начин/ цолтой гарч ирэх боломжтой гэж харж байгаа юм.
