Иргэн таны төлсөн татвараар төсөв бүрддэг. Харин төсвийн мөнгөөр аялж зугаалж байгаа нь олон нийтийн эгдүүцлийг хүргэж байгаа тохиолдол хэд хэд гарсантай холбоотойгоор Нийслэлийн засаг даргын тамгын газрын алба хаагчид, Нийслэлийн замын хөгжлийн газрын алба хаагчид хамтдаа Малайз улс руу “аялангаа ажилласан”, “архидан согтуурангаа туршлага судалсан” гэх мэдээлэл байна.
Ингэхдээ тэд ажлаасаа чөлөө аваагүй бөгөөд гадагшаа явсан гэдгээ нууцалсан байна. Улмаар олны хэл амнаас эмээж байнга онлайн байж цахимаар ажлаа хийсэн гэдгийг НЗДТГ-ын ажилчид ярьсаар байна. Тодруулбал, Нийслэлийн Замын хөгжлийн газрын Захиргаа, санхүүгийн хэлтсийн дарга Бямбадоржийн Билгүүн гэгч нь уг гадаад томилолтод явж байгаа ажилчдыг гар утсаа рүүминг үйлчилгээтэй болгож болохгүй хэмээн үүрэгдэж, улсын цэнхэр дугаартай авто машинаар өглөө гэрээс нь авч явсан байгаа юм.
Уг гадаад томилолтын зардлын эх үүсвэр нь Туулын хурдны замын төслөөс гаргасан гэх бөгөөд хэл ам гаргахгүйн тулд нягтлангаа авч явсан аж. Нийслэлийн замын хөгжлийн газарт Ахлах нягтлан бодогчоор Баярмагнайн Хонгорзул, тооцооны нягтлан бодогч Лувсандоржийн Мөнхцэцэг, Содном-Ишийн Мөнхжаргал нар ажилладаг байх юм. Уг гадаад томилолтод чухам хэн нь явсныг албан эх сурвалж тайлбарлах биз ээ.
Гадаад томилолтын хөтөлбөрт далайн эргээр зугаалах тухай багтсан бөгөөд долоон эмэгтэй, гурван эрэгтэй алба хаагч яваад архидан согтуурч, маргаж, шуугиан дэгдээсэн гэх мэдээлэл бий.
Бид энэ асуудлаар тодруулахаар дээрх нэр бүхий иргэд Монгол улсын хилээр гарсан эсэхийг албан эх сурвалжаас тодруулахад Монгол улсын хилээр нэвтэрсэн эсэх нь хувь хүний нууцтай холбоотой тул мэдээллийг өгөх боломжгүй гэв.
НЗДТГ-ынхан болон Нийслэлийн Замын хөгжлийн газрын алба хаагч нарын Малайз руу явсан өдөр нь татварын дарга нарын ирдэг өдөр аж. Нийслэлийн татварын албаныхны Дубайн “аялал” туршлага судлалт шүүмжлэл дагуулсан тул тэд ийнхүү аялал, туршлага судлалтаа нууцалсан аж.
Улсын төсвийг зориулалтын бусаар, үр ашиггүй зарцуулсан байж болзошгүй энэ асуудлын талаар бид бусад албан эх сурвалжаас тодруулж, хуулийн байгууллагад хандан шалгуулан эргэж мэдээлсээр байх болно.
А.Баярмаа
