“Эрдэнэт” үйлдвэрт нийлүүлж буй бараа бүтээгдэхүүнүүд нотой байгаа асуудлаар хэвлэл мэдээллийн хэрэгсэл болон олон нийт мэдээлж, шүгэл үлээдэг. Үүний жишээ болж иргэн н.Болдбаатар тендерийн шаардлага зөрчсөн бульдозер “Эрдэнэт” үйлдвэрт нийлүүлэгдсэн асуудлаар шүгэл үлээсэн байна. 
Тодруулбал, тендерийн баримт бичигт 2024–2025 онд үйлдвэрлэгдсэн, цоо шинэ гинжит бульдозер нийлүүлнэ гэж цагаан дээр хараар тодорхой заасан байтал “MINES UP3 ХХК уг шаардлагыг зөрчин, 2023 онд үйлдвэрээс гарсан, уулын хүнд нөхцөлд ашиглагдаж элэгдэлд орсон, тос гоожсон, зэвд идэгдсэн гинжит бульдозерыг “Эрдэнэт” үйлдвэрт нийлүүлсэн гэх ноцтой мэдээлэл ил боллоо.
Нийлүүлсэн бульдозер нь гинж, явах анги, үндсэн эд ангиудад ихээхэн элэгдэлтэй. Шинэ техникт тавигдах шаардлагыг хангахгүй байгаа нь харагдаж байхад Эрдэнэт үйлдвэр уг төхөөрөмжийг хүлээн авсан байна.
Хамгийн анхаарал татахуйц асуудал нь зургаан тэрбум 99 сая төгрөгийн өртөгтэй энэхүү техникийг чанарын хяналтын дүгнэлтгүй, мэргэжлийн шинжээчээр шалгуулаагүй, техникийн үнэлгээ хийлгүйгээр шууд хүлээж авсан байж болзошгүй гэх мэдээлэл юм.
Энэхүү нөхцөл байдал нь:
• Тендерийн баримт бичгийн ноцтой зөрчил,
• төсвийн хөрөнгийн үр ашиг,
• албан тушаалтнуудын хариуцлагын асуудлыг хөндөж байгаа бөгөөд уг асуудлыг хараат бус мэргэжлийн байгууллагаар нэн даруй шалгуулах шаардлагатайг иргэн н.Болдбаатар хэлсэн юм.
