Төрийн хэмнэлтийн тухай хуулиар бүх төсвийн хөрөнгөөр хийгдэж буй худалдан авах ажиллагаа жил бүрийн 5 сарын 31-ний дотор гэрээ байгуулагдан дууссан байх ёстой. Тэгж эс чадваас төсвөөс санхүүжүүлэхгүй, баталсан төсөв нь хэмнэлт болон төрийн сан хөмрөгтөө үлдэх хуулийн зохицуулалт үйлчлээд ХОЁР дахь жилийнхээ нүүрийг үзэж байна. Энэ жилийн 5 сарын 31-ний өдөр ойртлоо гэсэн шиг аймгийн Засаг дарга Н.Энхбат нүд улаан, мөнгө цагааны үлгэрийг амьдрал дээр жишээгээр үзүүлж байна.
Энэ аймгийн худалдан авалт, тендерт 10 хувийн яриа хөөрөөг урьдчилж хийхгүй орно гэж байхгүй авлигын хонгилыг Засаг дарга Н.Энхбат амжилттай угсарчээ.
Ярьсан компаниудаа ямар ч алдаатай байсан шалгаруул гэсэн хууль бус чиг үүргийг үнэлгээний хорооныхонд өгч хүчиндэж шийдвэр гаргуулдаг нь үнэлгээний хороонд гишүүнээр ажиллаж байгаа олон арван төрийн албан хаагчдыг өөрийн эрх ашгийн төлөө золионд гаргаж байгаа хүн чанаргүй үйлдэл мөнөөс мөн. Хууль хяналтын байгууллагын үүд хаалга тогшиход үнэлгээний хорооны шийдвэрт итгэсэн гээд өөрөө уснаас хуурай гарах байх. Монгол Улс хуультай орон болохоор хууль зөрчин гаргасан шийдвэрүүдийг цуцлах шийдвэр Сангийн яамнаас ирэхэд гомдол гаргасан огт танихгүй компаниас ичиж зовохгүй 10 хувиа нэхдэг үйлдэл энэ аймагт хэвийн үзэгдэл болжээ.
Ганцаараа тендерт орж ялалт байгуулсан компаниас хүртэл огтхон ч түүртэхгүй авах ёстой санхүүжилтээ авч байгаа мэт нэхэн авч байна.
Одоо нийслэл Улаанбаатарт биш Өмнөговь аймагт АТГ анхаарлаа хандуулах цаг нэгэнт болжээ. Энэ аймагт энэ мэт хууль бус үйлдэл гаарч авлига авч, хясан боогдуулах замаар төрийн ажлыг хийж байна. Ноён Энхбатын угсарсан авлигын схем нуран унахгүйгээр үл барам харин ч улам цэцэглэн хөгжиж арга зам нь улам нарийссаар байна.
