Эмээ нь залуудаа
Эгэл чам шиг залуу явсан
Эрээн мяраан гоё ганган хувцас өмсөж яваагүй ч
Эмээ нь залуудаа
Сайхан эрийн харцыг булааж
Саалийн хувиндаа сүү дүүргэж
Сартай шөнө болзоонд учирч
Саруул талдаа хонио билчээж явлаа
Дурдан бүсийг жэвхийтэл ороож
Дугуй малгайг духдуулан тавьж
Сумын клубт бүжиглэж явлаа Эмээ нь
Сайхан эрийн сэтгэлийг булааж явлаа Эмээ нь
Саруул талд гэрээ бариад
Хоёр талын хамаатнаа цуглуулаад
Хоёр сэтгэлээ нэг болгоод
Хуримлаж явлаа Эмээ нь
Цаг цагийн эрхээр хөгширч
Царай зүс минь гундсанч
Өөр шиг тань залуу халуун насаа
Үр ач нараа харж хайрлаж байна Эмээ нь
Үүрдийн биш зуурдын амьдралд
Үдээд өнгөрөх залуу насаарай гоёж яваарай бүсгүй минь
Залуу насны аагаар аархсанч
Заяаны ханиа зөв сонгоорой
Хувцасны сайхнаас илүү
Хүний сайхантай нөхөрлөөрэй бүсгүй минь
Эмээ нь залуудаа чам шиг эрийн харц булаасан
Эрийн хань морины чимэг бүсгүй байлаа.
(Н.Цэрэнноров)
