1072 хувьцааны ногдол ашгийг хэзээ өгөх нь тодорхойгүй байна
“Эрдэнэс Тавантолгой” ХК-аас хувьцаа эзэмшигчдэдээ ногдол ашиг хуваарилахаар болж, Үнэт цаасны төвлөрсөн хадгаламжийн төвөөр дамжуулан тавдугаар сарын 1-нээс иргэдэд ногдол ашиг олгох ажлыг зохион байгуулна гэж байсан. Гэвч уг ажил өнөөг хүртэл хэрэгжиж, иргэдийн гарт ноогдол ашиг хүрсэнгүй.
Энэ талаар Үнэт цаасны төвлөрсөн хадгаламжийн төвөөс тодруулахад “Иргэдэд хувьцааны ногдол ашиг олгох бэлтгэл ажлыг бүрэн хангасан. “Эрдэнэс Тавантолгой” компаниас ногдол ашигт хуваарилах мөнгөө дутуу шилжүүлсэн байгаа. Хэрэв мөнгө бүрэн шилжигдэж, Засгийн газрын шийдвэр гарвал ногдол ашгийг шилжүүлнэ. Хувьцааны ногдол ашгийг хэзээ шилжүүлэх нь одоогоор тодорхойгүй байна” гэв.
2020 оны тавдугаар сарын 20-ны өдрийн байдлаар 1,072 хувьцааны дансаа нээлгэж, баталгаажуулсан нэг сая орчим иргэний ногдол ашгийн мөнгө болох 60 тэрбум төгрөгийг “Эрдэнэс тавантолгой” ХХК Төрийн сангийн данс руу шилжүүлсэн байв.
Үүнээс хойш ногдол ашгийн мөнгө нэмж шилжүүлсэн эсэх болон үлдэгдлийг хэзээ бүрэн шилжүүлж гүйцээхийг 1,072 хувьцааны мэдээллийн төвөөс лавлахад тодорхой мэдээлэл өгсөнгүй.
