Ямар гоё шүлэг вэ шэйрлээд аваарай…
” Бүсгүйчүүдээ хайрла”
Зовлон нь ямар багадах биш дээ бүсгүй хүний
Золиосон дунд л амьдрах юм
Бусдын ая талыг олох гэж
Бурхан чөтгөрийн алинд ч хувилна
Үүрсэн олон ачаа нь бүгд хүнийх
Үнэндээ өөрийнх нь гэх зүйл огт үгүй
Үрээ гэж нэг эмтэрнэ ханиа гэж нэг элэгдэнэ
Үйлтээ юм шиг л амьдралд нухлагдана
Гангар шаазан шиг хагарахгүйг хичээнэ
Гадаа гэртийн алинд ч биеэ хэд хуваана
Гэргий нэр зүүж нэргүй ажил хийнэ
Гэм зэм нь юм шиг энэ бүхэнтэй эвлэрнэ
Турхин биеэнд нь даагдахгүй их ачаанаас нь
Тэнгэрлэг эрчүүд минь хагасыг нь ч гэсэн үүрэлц
Тунгалаг харцнаас нь ундрах ухааных нь
Талыг нь ч болов олж хараад суралц
Цагаан зээр шиг нутаггүй бүсгүйчүүдээ
Царайг нь гундтал хайраар бүү дутаа
Өмрөн өмрөн элэгдэдгийг нь бодож
Өнчин нулимс хацарт нь бүү дусаа
Сэтгэлийнх нь сүүг бүү дундруул
Сэвтээж бас битгий булингартуул
Итгэлийнх нь уулыг бүү нураа
Ир үзүүрийг нь битгий мохоо
Хайрлаад л байвал уяраад ирдэг юм гэнэлээ
Халамжлаад л байвал ургаад байдаг юм гэнэлээ
Бүсгүй нэр нь багадмаар бүлээн сэтгэлт хүмүүс шүү
Бүтэн жаргааж чададгүймаа гэхэд багахан шиг л зовоогоорой эрчүүд минь
