Нийслэлчүүдэд тунирхсан нэгдүгээр орлогч
Сонгинохайрхан дүүргийн иргэдийг төлөөлж өнгөрсөн зун УИХ-ын гишүүнээр сонгогдсон Д.Сумъяабазар иргэдийнхээ итгэл, сэтгэлийг хөсөрдүүлж, гишүүнээсээ татгалзаж, Хотын даргаар томилогдон ажиллаж эхэлсэн.
Тэрбээр ажлаа авсан даруйдаа өмнө нь өөрийн нь туслахаар ажиллаж байсан, дараа нь Сонгинохайрхан дүүргийн Засаг даргаар 4 жил ажиллаад НИТХ-д төлөөлөгчөөр сонгогдсон Ж.Сандагсүрэнг нэгдүгээр орлогчоороо томилсон бол нийслэлийн Засаг даргын Хүний хөгжил, нийгмийн бодлогын асуудал хариуцсан орлогчоороо мөн л өөрийн хүн болох өмнө нь Үндэсний хөрөнгө оруулалтын банкны хэлтсийн дарга, хожим нь СХД-ийн Засаг даргын орлогчоор хэдэн сар ажиллаад НИТХ-ын төлөөлөгчөөр сонгогдсон Н.Баярчимэгийг томилсон.
Мөн НЗДТГ-ын Хуулийн хэлтсийн даргаар аанай л СХД-ийн тамгын газрын хуулийн хэлтсийн даргаар ажиллаж байсан М гэгчийг томилсон байна.
Товчхондоо Сонгинохайрхан дүүргийнхэн нийслэлийг “удирдах” болсон.
Цар тахалтай холбогдуулан нийтийн хөл хорио тогтоосон энэ цаг үед НОК болон, хотын удирдлагаас гаргасан будлиантай, эргэж буцсан шийдвэр захирамжууд нь иргэд олон нийтийг удаа дараа бухимдуулсны учир ч үүгээр тайлагдаж байх шиг. Учир нь дүүргийн хуулийн хэлтсийн даргаар ажиллаж байсан М гэгчийн гаргаж, Хотын дарга Д.Сумъяабазараар батлуулсан захирамжууд нь дүүргийн хэмжээнд сэтгэж гаргасан, буруу бодож тооцоолсон болох нь тодорхой байгаа юм.
Хөл хорио эхлэх үеэр иргэд олон нийтэд хандаж бухимдсан, ялархсан, сүрдүүлсэн өнгөөр ярьсан Хотын дарга Д.Сумъяабазар сүүлдээ иргэдийн бухимдал, хэл ам, сэтгүүлчдийн асуултаас эмээж УОК-ын хуралдаанд нэгдүгээр орлогч болох Ж.Сандагсүрэнгээ илгээв.
Өнөөх нь мөн л сэтгүүлчийн асуусан асуултаас тойрч бултан, сүүлдээ твиттерт “Ийм үед заавал хэвлэлээр гарахгүй ажлаа тууштай хийх л хэрэгтэй гэж болжийн. Ярь гэсээр яриулах, дараа нь баалуулах.Яшиг зүэр” гээд хэлээ хазсан эрх хүүхэд шиг, Нийслэлийн Засаг дарга Д.Сумъяабазарт, эсвэл иргэд олон нийтэд тунирхаад, эрхлээд байгаа ойлгогдохгүй жиргээ оруулсан нь түүнийг төрийн ажил цаашид хийж чадах эсэхэд эргэлзэхэд хүргэж байна.
Өнгөрсөн 4 жилд Сонигохайрхан дүүргийн Засаг даргаар ажилласан энэ эрхэм дүүргээ хэрхэн хөгжүүлсэн вэ гэдгийг Сонгинохайрханчууд дүгнэж хэлнэ биз. Харин одоо хотыг хөгжүүлэхээр ирчихээд иймэрхүү байдалтай сууж байна.
Сонгинохайрхан дүүргийн дарга нарт нийслэлчүүд ямар өртэй болоод тэднийг Хотын удирдлагаар сонгоно вэ?
Т.Энхриймаа
