Халуу дүүгтэл хэлж хааяа зэмлэх нь хатуу мэт санагдавч
Ханийн чинь хувьд үглэх нь хүртэл жаргал мэт үнэтэй
Хайр нь дэндэхдээ харуулын цэрэг шиг үйл бүрийг ажин суух
Хадам ээжээ хайрлаж хажууд нь ойрхон яваарай
Бурхан тахилдаа нуух шахсан мөнхийн балчир үрээ
Бусдад өгнө гэхээр сэтгэлээс уяагдаад амаргүй ээ
Хөөрхий дөө холыг бодож гэнэ гэнэхэн үглээ л биз
Хадам ээжийгээ сонсож хажууд нь ойрхон яваарай
Өвөрт чинь эрхлэх амраг ижий энгэрт торниод
Өсч цэцэглэх насандаа чинийх болсоны учир
Харам сэтгэл хайр хоёртоо хааяа нэг мунгинаа л биз
Ханийхаа ээжий хайрлаж ойрхон яваарай
Ирээдүй хэмээх ууланд сэтгэлээр үржих хайрын үрийг тарьж
Ижийгээ ихэр болсон мэт баярлаж ил цагаахан амьдарч
Ийм сайхан ханийг ганцхан хадам ээж л чамд өгсөний учир
Ихэд ойрхон яваарай Ижий болсон хадам ээжээ хайрлаарай
Тэнгэрлиг сайхан хадам ээждээ ойрхон яваарай
Тэвчээргүй зарим нь миний хүүг хадамсаг гэнэ л биз
Тэр бүү хэл хадам ээжээс “холхон яв “ хэмээн дуулж
Тэрслүүтэж байсан ч хадам ээждээ ойрхон яваарай
Хожмын өдөр та нар цөмөөрөө ач зээ мөрөөдсөн хадмууд болно
Хорвоо хадам ижийгээр үргэлжлэнэ, хадам ээждээ ойрхон яваарай
