Засгийн газар болон УОК хариуцлага хүлээн Шадар сайд, Эрүүл мэндийн сайдаараа “туг тахисан.” Сайд нартай хамт ХӨСҮТ-ийн дарга Д.НЯмхүү, Өргөө амаржих газрын дарга Г.Баясгалан, НЭМГ-ын дарга Л.Төмөрбаатар нар хариуцлага хүлээх нь ч тодорхой болсон билээ.
Гэвч өчигдөр болон өнөөдрийн байдлаар НЭМГ-ын дарга Л.Төмөрбаатарыг өчигдөр үүрэгт ажлаас нь чөлөөлсөн. Түүнтэй хамт ХӨСҮТ-ийн дарга Д.Нямхүү, Өргөө амаржих газрын дарга Г.Баясгалан нарыг чөлөөлөөгүй л байна.
Харин чөлөөлөгдөх сургаар сандал ширээнээсээ зуурч үлдэх болно гэдгээ илэрхийлсэн хүнээр Өргөө амаржих газрын дарга Г.Баясгалан тодорч байна.
Тэрбээр “Би ажлаа өгөхгүй. ХӨСҮТ-ийн дарга Д.Нямхүү ажлаа өгөөгүй байхад би яахаараа ажлаа өгдөг юм. Би биш харин Д.Нямхүү хариуцлага хүлээнэ” гэсэн агуулга бүхий зүйл яриад сууж байна.
Түүнийг үүрэгт ажлаас нь чөлөөлөх эрх хотын даргад бус НЭМГ-ын даргад бий. Гэтэл НЭМГ-ын даргыг тушаал гаргаж Г.Баясгаланг чөлөөлөхөөс өмнө бөх хотын дарга тушаал гаргаад Л.Төмөрбаатарыгаа “золигт гаргачихлаа”.
Нярайн аппарат “алга болж” хажуухан дахь хувийн эмнэлгээс олдсон, нярай эхтэйгээ эндсэн гэх зэргээр тэрбээр энэ суудалд сууснаасаа хойш цөөнгүй алдаа дутагдал гаргасан гэдгийг нийгмээрээ, түмэн олноороо мэднэ.
Эмнэлгийн дотоод зохион байгуулалтаа хийж чадаагүйгээс нь болж өнөөдөр нийгмээр нь талцуулж чадсан Г.Баясгалан ажлаа өгөхгүй хэмээн гүрийж, сандал ширээтэйгээ зууралдах нь хэр зохимжтой үйлдэл вэ?
