Дайчилгааны тухай хуулийн дагуу цэрэг, стратегийн сургалтыг УИХ-ын гишүүд, ЗГ-ын гишүүд, яамдын ТНБД, аймаг, сум, дүүргийн засаг дарга нарыг хамруулдаг.
Уг хуулийн дагуу бүх яамдын төрийн нарийн бичгийн дарга нарыг өнгөрсөн баасан, бямба гаригт Төв аймгийн Алтанбулаг сум дахь Таван толгой дахь зэвсэгт хүчний сургалтын нэгдсэн төвд сургажээ.
Уг сургалтад Цэргийн дуу бүжгийн эрдмийн чуулгын уран бүтээлчдийг “дайчилсан” байна. Ингэхдээ уран бүтээлчдээс 2021.03.24-ны өдөр PCR шинжилгээ авч, 2021.03.26-ны өдөр автобусанд 40 гаруй хүнийг тээвэрлэн авч явсан байна. Харин уг бүрэлдэхүүнд багтсан нэг бүжигчин бүсгүйн хариу гараагүй байхад явсан бөгөөд тухайн хүн халдвартай болох нь тогтоогдсон байна.
Ингэснээр бүх яамын төрийн нарийн бичгийн дарга нар халдвартай иргэний ойрын хавьтал болж байгаа юм.
Цар тахлын үед бүлэг бөөгнөрөл үүсгэхгүй байх, халдвар хамгааллын дэглэмийг сахиулах ёстой байсан. Гэвч УОК-ийн бүрэлдэхүүнд багтдаг батлан хамгаалахын сайдын харъяа газарт ийм хариуцлагагүй үйлдэл гарсанд болон мэдээллийг тэнцвэртэй хүргэх зорилгоор тус яамны хэвлэлийн төлөөлөгчөөс тодруулахаар залгасан боловч утсаа авсангүй.
Халдвартай иргэний ойрын хавьтал болсон төрийн нарийн бичгийн дарга нарын хувьд уг сургалтаа дуусаад цэргийн цол авдаг. Одоогоор тэднийг тусгаарласан эсэх нь тодорхойгүй байна.
Үүнээс гадна Цэргийн дуу бүжгийн эрдмийн чуулгын ажилчдыг өнөөдөр дахин цуглуулж арга хэмжээнд оролцуулах гэж байсан боловч тараасан байна. Уг нь цар тахлын үед баяр наадам, сургалт хийх нь битгий хэл бүлэг бөөгнөрөл үүсгэхгүй байхад УОК-ын бүрэлдэхүүнд байдаг.
Батлан хамгаалахын сайд анхаармаар..
А.Баярмаа
