Одоогоос яг 10 жилийн өмнө дуучин Самандын Жавхлан, “Шуранхай”-н Эрдэнэчимэгтэй хамт амьдарч байна гэсэн монголчуудын анхаарлыг татсан билээ.
Хоёр од нэг тогоонд багтдаггүй гэлцдэг. Харин нийтийн дууны ханхүү, “Шуранхай” хамтлагийн мисс бүсгүй хоёр хамт амьдарсан 10 жилдээ, хазгай гишгэж хэл амны бай болсонгүй. Бөхийн өргөөг долоо найман өдөр торохгүй дүүргэдэг дуучин С.Жавхлан УИХ-ын гишүүнээр дөрвөн жил ажиллаж, уртын дууч бүсгүй дөрвөн хүүхэд төрүүлж Алдарт эхийн одон зүүсэн.
“Зургаан ханатай гэр минь”, “Энхэр ээж”, “Хонгор үр минь” гээд хэд хэдэн сайхан дууг дүрсжүүлсэн Г.Эрдэнэчимэг ингэний хоормог рекламдах болжээ. Тэр бүр лайв хийгээд байдаггүй түүнийг контентын зах зээлийг эзэгнэхээр завдаж байна хэмээн сошиал хэрэглэгчид хошигнох болсон байна.
С.Жавхлан, Г.Эрдэнэчимэг хоёр 2013 онд хамтдаа “Хар хархан харц” дуу дуулсан нь Монголоос “ютүб”-эд хамгийн их үзсэн дуу болж билээ. Тэр клипэндээ хоёр том охиноо тоглуулсан билээ. Хүүхдүүдийнхээ гэрэл зургийгч хэвлэлд гаргадаггүй С.Жавхлан, Г.Эрдэнэчимэг хоёр дөрвөн хүүхэдтэйгээ, халуун ам бүлээрээ “Эхийн дуу”-ндаа тоглуулсан нь клипийг нь улам чимж, өнгө нэмж байв.
