“Голомт” банкны ТУЗ-ийн дарга Д.Баясгалангийн хүү Б.Дөлгөөн “Од ба Гэгээ” киногоороо үзэгчдийн танил болсон. Дуучин, хөгжимчин Magnolian буюу “Fat Cat Jazz Club”-ийн хамтран байгуулагч Б.Дөлгөөн мууранд тунчиг хайртай бөгөөд дэлхийн хамгийн үнэтэй British Shorthair үүлдэрийн муурыг тэжээдэг аж.
Энэхүү муурны зах зээлийн ханш 800-1,000 ам.доллар буюу монгол мөнгөөр 2,140,800-аас 2,676,000 төгрөгийн ханштай аж. Бусад муураас гэр бүлд тэр тусмаа хүүхдэд маш ээлтэй муур бөгөөд ялдам, зөөлөн ааштайгаараа алдартай гэнэ.
Түүний муурыг Кора гэдэг бөгөөд муурныхаа тухай “Кора эхнэр бид хоёрт аз жаргал бэлэглэдэг, амьдралын маань чухал хэсэг. Бид хоёр гэрлэхээсээ сарын өмнө Кораг үрчилж авсан юм. Нэг удаа таньдаг найз маань инстаграм дээр British Shorthair үүлдрийн дөрвөн зулзаганд гэр бүл хайж буй тухай мэдээлэл оруулсныг хараад очиж уулзсаны эцэст худалдаж авахаар шийдсэн. Тухайн үед муур тэжээхдээ бүрэн итгэлгүй байсан ч Кораг хараад шууд л сэтгэл татагдсан даа. Ингээд эхтэй нь хамт хоёр сар байлгасны дараа нэг бороотой өдөр очиж авч билээ.
Зориулалтын цүнх авж амжаагүй байсан учраас өмсөж явсан хувцсандаа бяцхан Кораг ороогоод гэр лүүгээ харьсан. Эхнэр бид хоёр өмнө нь амьтан тэжээсэн туршлагагүй. Амьтан тэжээнэ гэдэг маш том хариуцлага учраас муураа авахын өмнө маш сайн судалж, амьдрах орчныг нь бүрдүүлсэн” гэжээ.
