Одоогоос 20-оод жилийн өмнө Гала хамтлаг рок попын ертөнцөд цахиур хагалж, гэрэл гялбуулдаг байв. Тэдний нэг нь дуучин Ану буюу Уранхолбоо.
Нийгмийн сүлжээнд нөлөөлөгчийн үүргийг чадварлаг гүйцэтгэдэг тэрээр дэрсхэн өсч яваа 5-н сайхан охинтой. Таван охин төрүүлсэн ч өөрийнхөө гоолиг бие, гоо сайхнаа алдаагүй тэрээр гэр бүлдээ үйлчилдэг дүрмээ нэгэн хэвлэлд сонирхуулжээ.
Тэрээр “Би хүүхдээ их бөөцийлдөг байсан юм. Тэр үед ээж минь “Жаахан тэнцвэртэй байлгаарай. Хэт цэвэрхэн байх шаардлагагүй. Гадаад орчинтой харьцуулах хэрэгтэй. Шороонд хүргэ, элсэн дээр тоглуул. Та нар ингэж өсөөгүй” гэдэг байв. Тухайн үедээ “таны цаг нэг өөр, одоо цаг нэг өөр” гэж үгүйсгэх хандлагатай байсан ч ээжийн зөв гэдгийг зөнгөөрөө ойлгосон доо ч юм уу, зөвлөгөөг нь хэрэгжүүлж эхлэн, үнэхээр л тийм болохыг ойлгосон доо. Зөвлөгөө авах тухайд гэвэл хүүхэд өсгөх тал дээр үнэхээр туршлагатай хүн юм уу мэргэжлийн сэтгэл зүйч л хэлж байгаа биш бол өөрийн судалж мэдсэнээр хийх нь илүү үр дүнтэй гэж боддог. Хүүхдийг гурван настай болтол нь хөхүүлэх ёстой гэх тогтсон хандлага байдаг бол өөрөө судлаад үзэхээр зургаан сар хүртэл нь хөхүүлэхэд хангалттай гэх мэт.
Бид өглөөг эрүүл, амттай өглөөний цайгаар эхэлдэг. Ихэвчлэн аав нь бэлдэж өгдөг. Үүнээс 30 минутын дараа бүгд витаминуудаа ууж, гэртээ агаар оруулан цэвэрлэгээ хийдэг. Бид хоёр бүх шал, өнцөг булан бүрийг тогтмол, сайн цэвэрлэхгүй бол бага насны хүүхдүүдийн эрүүл аюулгүй байдалд нийцэхгүй. Үүний дараа ажилдаа явахаар хүүхдүүдээ эмээд нь үлдээгээд явдаг. Гэхдээ бид хоёр ямар ч ажилтай байсан зав гаргаад тэднийгээ камераар хардаг. Орой нь хүүхдүүдээ унтуулахдаа эхлээд өрөөнд нь агаар оруулж, хүчилтөрөгчийн аппарат асааж тайвшруулах үнэртэн тавьдаг.
Ингээд гурван охиноо оронд нь оруулаад 10-15 минут тархи амраах хөгжим сонсгож байгаад унтуулдаг. Дараа нь хоёр ихрээ унтуулна. Манай хүүхдүүд хөгжим сонсоод нэг их асуудалгүй унтчихдаг юм. Хүүхдүүдээ унтуулчихаад нөхөр бид хоёр кино үзэж, өдөр болсон зүйлсээ ярилцаж байгаад амардаг” хэмээн ярьжээ.
