Ширхэг тутамдаа ЭМЯ-наас гаргасан үнэнээсээ 20-23 дахин нэмэгдэл үнээр эмийн сангуудаар борлуулагдаж байна гэх хардлагыг төрүүлж нийгэмд дуулиан шуугиан тариад байсан алдарт “Арибидол”-ыг дотооддоо үйлдвэрлэх боломжтойг албаны эх сурвалж хэвлэлд мэдээлжээ.
ЭМЯ-ны эх сурвалжийн мэдээллээр “Эмийн зөвлөл хуралдсан. Вирусний эсрэг эмийн үнийг сүүлийн үед хөөрөгдөх хандлага гарч байгаа. Компаниуд вирусний эсрэг эмүүдийг харилцан адилгүй үнээр оруулж ирж байгаа. Компаниуд нэг удаагийн лицензээр эм бэлдмэл оруулж ирэхдээ, ямар үнээр худалдах, санал болгох зөвшөөрөл авсан байдгийг ЭМЯ болон Эм, эмнэлгийн хэрэгслийн хяналт зохицуулалтын газрын цахим хуудсаар мэдээлнэ” гэсэн юм.
Тус вирусын эсрэг эмийн үнэд ШӨХТГ-аас хяналт хийж, нэг хайрцгаас нь дөнгөж л 200 төгрөг бууруулж чадсан байдаг. Ингэхдээ тэд “Вирусний эсрэг эмийн ширхгийн болон багцын үнэд хяналт, шалгалт хийж, илэрсэн зөрчлүүдэд арга хэмжээ авч ажиллана. Мөн Ковид-19 халдварын үед яаралтай горимоор импортлох нэг удаагийн зөвшөөрөлтэй бусад эмийн үнийг олон нийтэд ил тод мэдээлэх болно гэсэн юм.
Харин“Монголын Эм Зүйн Байгууллагуудын Нэгдсэн Эм Холбоо”-ны тэргүүн И.Балжинням уг асуудалд хэвлэлд байр сууриа илэрхийлжээ. Тэрээр “ОХУ, Украин, БНХАУ-аас “Арбидол” эмийг оруулж ирж байна.
Үйлдвэрлэгчээсээ шалтгаалан үнэ нь харилцан адилгүй байна. Тухайлбал, ОХУ-аас импортлож буй “Арбидол” 100 мг, 20 ширхэгээр савлагдсан эм 25,000 төгрөг орчим өртөгтэйгөөр орж ирж байгаа бол БНХАУ-ынх 12,000 төгрөг орчимд өртөгтэй байна. Гааль, НӨАТ-аас чөлөөлсөн боловч, энэ хөнгөлөлт нь зөвхөн хилээр орж ирэхэд тооцогдож байгаа. Дэлхий нийтээрээ тээвэрлэлтэд хүндрэл үүссэн, дагаад үнэ дунджаар 2-3 дахин өссөн. Сүүлийн үед Замын-Үүд боомтод үүссэн нөхцөл байдлаас шалтгаалан тээврийн хэрэгсэл олдоцгүй болж үнэ нь 5 дахин өслөө. БНХАУ –ын Тяньжин боомтод ачаа 2 сараас дээш хугацаагаар гацаж байна. Үүнээс шалтгаалаад эмийн нөөц бүрдүүлэх зорилгоор онгоцоор ачаагаа авах зохион байгуулалтыг хийх байгаа. Жишээ нь, Хятадаас авах яаралтай эмийг Сөүлээр дамжуулан авах зэрэг зохицуулалтыг хийж байна.
“Арбидол” эмийг дотооддоо үйлдвэрлэх боломжтой болж байгаа. Төрийн зүгээс дэмжлэг хэрэгтэй байна. Дотооддоо үйлдвэрлэсэн тохиолдолд үнийг хоёр дахин бууруулах боломжтой” гэв.
