Ерөнхийлөгч У.Хүрэлсүхийн тангараг өргөх өдрийг зурхайчаар зуруулж байж тогтсон болов уу гэмээр санагдсан. Яагаад гэвэл 2021.06.25 нь зуны дунд хөх морин сарын шинийн 16-ны гурван хөх мэнгэтэй хөх луу өдөр байгаа. У.Хүрэлсүх бич жилийн (1968) зуны дунд сарын 19-ний хөхөгчин туулай өдөр сүлд гарагтаа төрсөн хүн юм байна. Тэгэхээр өдрийн хувьд бич жилтэнд ивээл, гарагийн хувьд сүлд гарагтаа, хуучны тооллоор их улаан тэргэл өдрийг сонгон тангараг өргөжээ.
Энэ өдөр хөх өнгийн дээл өмсөж болохгүй гэж өмнө нь миний бичсэний учир нь ийм олон хөх давхцаж байгаа өдөр өмсөх хувцас нь хөх өнгөтэй байж болохгүй гэдэгт л байсан юм. Төрийн үйлд олон хөх давхцахаар үер усны аюул ихтэй, үйлийн өнгө хийгээд язгуур нь хүйтэн талдаа болдог гэж үздэг. За даа, би ямар зурхайч биш үүнээс цааших нарийныг жинхэнэ зурхайчдад үлдээе.
Харин тангараг өргөхдөө өмссөн хувцас нь Монгол төрийн тэргүүний ёслол хүндэтгэлийн хувцасны уламжлалд баримталж ирсэн өнгөний утга бэлгэдлийн хувьд нийцсэн, хээний утга бэлгэдлийн хувьд огт хамааралгүй хувцас харагдана лээ. Сүүлд сошиалаар зохион байгуулалттай сэвээд байсан бүс, малгай, гутлын тухай тайлбар бол учир мэддэг хүний хөх инээд хүргэхээс цаашгүй гэнэн магтаал харагдсан. Төрийн ёслолын алба, зөвлөхүүдийнх нь албан ёсны тайлбарыг хүлээе дээ.
Хаа гэж төрийн ёслолын үеэр тэрбээр УИХ-ын дарга, Ерөнхий сайд хоёр шигээ дээлийнхээ захыг задгайлалгүй, бүрэн товчилсон харагдсан. Урлаач нь өмсөх хүнийхээ мөр нь булчинлаг овгордууг тооцоогүйгээс захны суултан дээр үл ялиг алдсан, энгэрийн харааг арай өргөдүүлсэн, гурвалсан эмжээр нарийдсанаас товч шилбэ нь том, бүдүүн мэт харагдаж байгаагаас бусдаар сайхан ард дээл байна лээ.
Оба Ерөнхийлөгчөөс хойшхи бүх Ерөнхийлөгч нарын тангараг өргөхдөө өмссөн дээлэн дотор утга бэлгэдэл, урлахуйн талдаа Ц.Элбэгдоржийн усан ногоон өнгийн дээл хамаагүй илүү байна. Урлаачид, зөвлөөчдөд нь талархмуй.
Б.Галаарид
