Тулгар төрийн 2230, Их монгол улс байгуулагдсаны 815, Ардын хувьсгалын 100 жилийн ой, Үндэсний их баяр наадмын бэлтгэл энэ өдрүүдэд Хүй долоон худагт болж байгаа. Өнгөрсөн жилийн наадам шиг цахим хэлбэрээр болох наадам анхнаасаа олны шүүмжлэлд өртөж байгаа бөгөөд бид энэ талаар сурвалжлахаар Хүй долоон худагт очсон юм.
Энэ жилийн наадмын нээлт, хаалтад 850 сая төгрөг зарцуулагдаж байгаа бөгөөд найруулагч Н.Наранбаатар цахим наадам хийх юм бол би оролцохгүй хэмээн эгдүүцлээ илэрхийлж ажлаа хаясан гэх мэдээлэл бий. Тэгвэл энэ мэдээлэлтэй зэрэгцэн олны эгдүүцлийг хүргэсэн зүйл бол цахим наадам Хүй долоон худагт хэн ч нэвтрэх боломжгүйгээр буюу бөхийн барилдаан, сур харваа болох талбайг тойруулан шуудуу ухаж, ганцхан орц гарцаар орохдоо цагдаагийн өндөр хамгаалалтыг давах ажээ.
Цагдаагийн энэхүү хамгаалалтыг давахдаа QR код авч, түргэвчилсэнгээр тест өгнө. Энэхүү шалгуурыг давахгүй бол давааны цаана байрлах наадмын талбайд очихгүй. Учир нь наадмын талбайг тойруулан ийм гүнзгий шуудуу ухсан байгаа.
Өнгөрсөн жил цахим наадмыг 13-р зуун амралтад хийсэн. Харин энэ жил Хүй долоон худаг худаг буюу Төв аймгийн Аргалант суманд хийж байгаа. Үүнтэй холбоотойгоор ойр орчмын айлуудыг нэгхэн хоногийн дотор нүү. Эс бөгөөс албадан нүүлгэх болно гэсэн албан үүргийг сумын засаг дарга болон цагдаагийн байгууллагаас өгсөн байна. Бөх, сур харваа болох газраас 10 гаруй км хол орших айлыг хүртэл нүү хэмээн цагдаа нар өдрийн гурван удаа ирж, нутгийн айлуудад сүрийг үзүүлж байгаа аж.
Төв аймгийн Аргалант сумын малчин н.Доржготов гол ус бараадан сүүлийн 20 жил энэ газарт зусаж байгаа. Гэтэл нэг л өдөр ийнхүү хөөгдсөн тул наадам дуустал малаа дагаж, машиндаа хоноглох болоод байна.
https://youtu.be/CDZjj5x4C08
Ард нийтэд биш ноёдод зориулсан наадмын эгдүүцэл төрүүлсэн зүйл үүгээр дуусахгүй. Ноёдын наадмын бэлтгэлийг хангуулахын тулд төрийн албан хаагчдыг ажлын цагаар Хүй долоон худагт гэр майхан бариулж байгаа. Тэднийг өдөр шөнөгүй дайчилж байгаа юм.
Ард түмэн, бүх нийтээрээ баярлах ёстой Тулгар төрийн 2230, Их монгол улс байгуулагдсаны 815, Ардын хувьсгалын 100 жилийн ой, Үндэсний их баяр наадам ийнхүү ноёдын наадам болох нь тодорхой боллоо. Харин иргэдийг наадмаар хөдөлгөөн саармагжуулаарай гэх даалгаврыг өнөөдөр Засгийн газраас өгсөн.
Эцэст нь дүгнэхэд, эрх мэдэлтэй төрийн түшээд, хөрөнгө мөнгөтэй бизнесмэнүүд, нам дагаж цүнх баригсад дэнж хотойтол наадах нь. Харин эгэл жирийн энгийн иргэд наадах нь бүү хэл, наашаа цаашаа явж голын тохойд суух ч эрхгүй болох нь тодорхой боллоо.
