Монголын хошин урлагийн салбарын нэгэн цагийн түүхийг бичилцэж, кино урлагийн салбарт өөрийн дүрээ мөнхөлсөн Монголчуудын хамгийн хайртай уран бүтээлчдийн нэг бол Амбий буюу Цэвэгсүрэнгийн Батхуяг агсан.
Урлагт өөрийн амьдралаа зориулсан энэ эрхмийн ууган хүү Б.Эзэнбат ч өдгөө аавынхаа үргэлжлэл болж, жүжигчин, кино найруулагчийн мэргэжлээр ажиллаж байна. Тэрээр өдгөө үзэгчдийн хүртээл болоод буй “Гэнэтийн зочин” инээдмийн цувралын найруулагчийн багт ажиллаж буй бөгөөд тус бүтээлд өөрийн оюунаа шингээн урлаж байгаа аж.
Б.Эзэнбатын хувьд найруулагч, жүжигчин мэргэжлийг монголд эзэмшээгүй. БНСУ-ын “Кёнги Дэ”/Kyonggi University/ их сургуулийг жүжигчин, найруулагчийн мэргэжлээр төгсчээ. Түүний хувьд өмнө нь “Бүтэн амьдрал” кинонд найруулагчийн туслахаар ажиллаж ажлын гараагаа эхэлж байсан байна.
Тэрээр аавынхаа талаар “Манай аав, ээж хоёулаа жүжигчин мэргэжилтэй хүмүүс. Ээж маань ч СУИС-ийг төгссөн. Жүжигчний мэргэжил маш их хөдөлмөр, цаг хугацаа тууштай байдал, авьяас чадварыг тухайн хүнээс шаарддаг. Аав маань энэ бүхний биеэрээ мэдэрсэн учраас эхэндээ дэмжээгүй, намайг хуульч болгоно гэж ярьдаг байсан. Тэгээд аравдугаар ангид ороход надаас “Миний хүү хуулийн мэргэжилтэй болох уу” гэж асууж байсан. Би ч жүжигчин л болно гэж тас зөрсөн. Тэгтэл аав “За тэгвэл аав нь дэмжинэ ээ” гэж хэлж байсан.
Аав маань маш мэдрэмж өндөртэй, ухаантай хүн байсан. Хошин мэдрэмжтэй хүмүүс их өндөр IQ-тэй байдаг гэж ярьдаг. Хүнийг инээлгэнэ гэдэг маш том философи, ухаан шүү дээ. Аав маань яг одоо дэргэд байсан бол хүүдээ их зүйлийг зааж өгөх байсан даа гэж их боддог. Найруулагч, жүжигчин аль алинд нь надад сурах зүйл их бий. Одоо сураад л явж байна. Энэ мэргэжлийг эзэмшсэн хүн насан туршдаа суралцдаг. Аав нэг удаа “Энэ мэргэжилд дуртай байгаад, хүсэл байлаа гээд чи хийж чадахгүй. Тиймээс энэ мэргэжлийг чин сэтгэлээсээ хайрла. Битгий шантар” гэж хэлдэг байсан. Миний эргэн тойронд энэ мэргэжлээр төгссөн ч шантраад орхисон олон залуус байдаг. Тиймээс битгий шантраарай, тууштай байгаарай гэж хэлмээр байна. Залуудаа биш, нас яваад хүмүүст танигдаж, кинонд дүр бүтээсэн уран бүтээлчид ч цөөнгүй байдаг шүү дээ. Бидэнд цаг хугацаа байна. Битгий шантраарай гэж хэлмээр байна. Аав маань үүнийг байнга хэлж, захидаг байсан” гэжээ.
