Ардчилсан намын бүлгийг задлаж, Ардын намынхантай эсрэг МАНАН-гийн эсрэг жагсаал зохион байгуулж явсан Ж.Батзандан шагналаа авч Австрали улсад суух Элчин сайдын яамны зөвлөхөөр томилогдсон.
Тэрбээр хэдхэн хоногийн өмнө энэ албан тушаалаа цөллөгтэй жишиж явдгаа нуусангүй, нүүр номдоо цөллөгийн газрын “тэмдэглэл” бичиж олны анхаарлыг өөртөө татаж байв.
Тэгвэл өнөөдөр тэрээр Элчин сайдаар очоогүй, энэ албан тушаалаа “чамалж” байгаагаа илэрхийлж “Миний бие Монгол улсын үндсэн хуулиар олгогдсон хэвлэн нийтлэх эрхийнхээ хүрээнд өөрийн сошиал платформуудаараа дамжуулан нийтлэл, мэдээлэлүүд тогтмол хүргэх болно. Мөн миний бие Монгол улсын Элчин сайд биш, харин хууль, улс төр, эдийн засаг, нийгмийн судлагаа хариуцсан Зөвлөх нэртэй ажилтан болохыг зөвөөр ойлгоно уу. Гадаадад зөвхөн томилогдсон элчин сайд л Монгол улсыг албан ёсоор төлөөлнө. Судлаач, зөвлөх төлөөлөхгүй гэдгийг ч энэ дашрамд дуулгая” гэжээ.
Ж.Батзандангийн “энтертайментынхаа” хөлсөнд авсан энэхүү алба нь дипломат албанд зүтгэж яваа олон хүний нэг насны мөрөөсөл байдаг. Зарим нь насаараа ийм албыг мөрөөдсөөр тэтгэвэртээ гарах нь бий. Харин Ж.Батзандангийн хувьд бол ердөө цөллөг төдий алба болсон нь харамсалтай. Элчин зөвлөхөө цөллөг гэж бодож байгаа хүн иргэдийнхээ төлөө үйлчлэх нь юу л бол.
Монголын дипломат албыг “бэлгийн морь” болгож хувиргасныхаа гоочлол,
доромжлолыг Монголын төр захын нэгнээс амсаж байна. Монгол Улсаас Австралид суугаа Элчин сайдаар Б.Чулуунхүү ажилладаг. Түүний томилгоот хугацаа ирэх жил дуусна. Тиймээс суудлыг нь авахаар Ж.Батзандан “унжаад байхаар унаад өгөөсэй” гэх нь холгүй хүлээж суугаа гэх бор шувуу ч нисэх болсон.
Түүнчлэн Ж.Батзандангийн жолоочоор ажиллаж байсан н.Ганхөлөг гэх залууг УБТЗ-ын Худалдааны албаны даргаар томилсон гэх мэдээлэл байна. Өөрөөр хэлбэл, Ж.Батзандангийн төрсөн ах Ж.Бат-Эрдэнэ нь Зам тээврийн яамны Төрийн нарийн бичгийн даргаар ажилладаг. Тиймээс дүүгийнхээ жолооч хийж явсан залууг том дарга болгож “дэвшүүлсэн” гэх. Ийнхүү дарга нь тэнд “цөллөгт” ядарч явсан ч жолоочоо хувь нийлүүлсэн компанийн худалдааг хариуцсан дарга болгон аархаж байна.
