Түүх: Богд хааны түргэн баатар Дамирангийн Нанзад нь Түшээт хан аймгийн Эетэй бээлийн хошуу одоогийн Өмнөговь аймгийн Манлай сумын нутагт 1891 онд Дамирангийн 7-р хүү болон мэндэлжээ. Д.Нанзад нь 1910 онд цэргийн албанд дайчлагдан 1912 оноос тусгаар Монголынхоо төлөө таван жил тасралтгүй байлдаж Богдын засгийн газраас “Түргэн Баатар” цолоор шагнагджээ. 1920 оноос Хужирбулангийн цэргийн хуучны танил Дамдины Сүхбаатарын хамтаар хувьсгалын үйл хэрэгт хүчин зүтгэж Ардын журамт цэргийн анхны хорооны даргаар томилогдон гамин барон цагаантаны үлдэгдлийг бут ниргэжээ.
Д.Нанзад баатар 1922 онд дайчин нөхдийн хамтаар Дамбийжааг устгах тусгай ажиллагааг тушаал ёсоор гүйцэтгэжээ. Д.Нанзад баатар Дамбийжаагийн толгойг нь тасдаад бариад гарч ирэхийг харсан жа ламын цэргүүд тал тал тийшээгээ тарж бутарч байсан гэдэг. Д.Нанзад баатар 1923 оноос зүүн баруун хязгаарын цэргийн хороодын захирагч дарга, Цэргийн яаманд ажиллаж байгаад 1930 онд өвчний улмаас таалал төгссөн.
Тэмдэглэсэн: ДОКТОР ХУРАНДАА ДОРЖПАЛАМЫН ЭРДЭНЭЦОГТ
