“Альтернатив” Отгоо нэрээрээ олонд танигдсан дуучин Х.Отгончимэг өдгөө дөрвөн хүүхдийн ээж болсон. Тэрээр өөрийн цахим хуудаснаа хайртай ээж болон өөрөөсөө “ургасан” дөрвөн хүүхдийнхээ зургийг дэлгэжээ.
Дуучин бүсгүйн хувьд урлагийн тайзнаа 20-оод жилийн өмнө содон стиль имидж, залуу нас, гоо төрх, рок хэмнэлээрээ орж ирсэн ч өнгөрсөн хавар буюу 2021 оны дөрөвдүгээр сард Соёлын тэргүүний ажилтан цол тэмдгээр энгэрээ мялаалсан.
Монголын рок попын ертөнцөд өөрийн өвөрмөц стиль имиж, дүр төрх, дуу хоолойгоороо орон зайгаа бий болгож чадсан түүний “Заримдаа”, “Нэгэн залуу”, “Чамайг би хайрласаар” зэрэг олон бүтээл нь залуусын дуулах дуртай дууны нэг болсон.
Авьяаслаг дуучин бүсгүйн хувьд 30 насныхаа босгонд гэр бүлийн амьдрал зохиож байсан бол одоо дөрвөн хүүхдийн ээж болсон. Тэрбээр өнгөрөгч 2019 оноос уран бүтээлдээ ханцуй шамлан орсон. Энэ үеэр цоо шинэхэн пянзаа гаргаад амжсан юм.
https://www.youtube.com/watch?v=GuG5QsjaWAo
Тэрбээр нэгэн ярилцлагадаа “Хамгийн сүүлд 2008 онд өөрийн бие даасан тоглолтоо хийснээсээ хойш гэр бүлийн амьдралдаа анхаарч, чимээгүй байлаа. Гэхдээ өнгөрсөн хугацаанд ганц нэг дуугаа дуулж, 2014 онд өөрийн гурав дахь “Chillout” цомгоо гаргасан. Гэр бүлийнхэндээ илүү цаг зарцуулахын хажуугаар уран бүтээлээ хийж байсан учраас мэдэх хүмүүст маань л хүрсэн болов уу. Харин энэ удаа уран бүтээлийнхээ ажилд илүү шаргуу орж байна” гэдгээ хэлж байв.
