Одоогоос гурван сарын өмнө МҮОНРТ-ийн хөтлөгч байсан Э.Энхзориг “Хар сарнай” хамтлагийн дуучин С.Амармандах буюу Амараад дарамтлуулж, бизнесээ алдсан талаараа хэвлэлд яриа өгч байв.
Тэрбээр “Дуучин С.Амармандах гэдэг хүнд бүх эд хөрөнгөө алдлаа. Найзтайгаа 2019 онд хамтран “Gem palace”-ийн 17 давхарт байрлах дампуурсан хоолны газрыг нь лоунж болгон өөрчилж, дотор засал чимэглэл, тохижилт үйлчилгээг нь өөрийн хөрөнгөөр хийсэн. Үүний дараа 2020 оны есдүгээр сард С.Амармандах тус газарт ирж дуулахдаа Э.Энхзоригт хандан “Үнэхээр гоё газар нээсэн байна, хамтарч ажиллах санал байгаа. Дараа тухтай уулзья” гэж хэлээд, “Би энэ газрын нэг давхарт баар нээж байгаа. Манайд хоол гарах боломжгүй. Танай лоунжийн гал тогоо таалагдаж байна. Чи хувьцаанаасаа надад өгөөд миний дор ажил. Чи миний таньдаг урлагийн дүү биш байсан бол зодоод асуудлыг шийдэх байлаа. Энэ барилгын эзэн чинь манай найз. Хөөгөөд гаргаж чадна шүү. Хууль шүүхийнхнээс эхлээд хар өртөнцийн бүх эрх мэдэл миний халаасанд байна. Дүү минь чи бодолтой байгаарай” хэмээн ярьж байв.
Улмаар Э.Энхзориг түүний тавьсан саналын хүлээж аваагүйгээс болж бүтэн нэг жилийн хугацаанд талбай түрээслэгч эздээс маш их дарамт шахалт ирсэн. Улмаар долоон сая төгрөгийн түрээс дутуу гэж хүчээр газрыг лацдаж авсан. Дараагаас нь “Gem palace”-ийн эзэд таван жилийн хугацаатай хийсэн гэрээгээ ямар ч үндэслэлгүй цуцалчихсан” гэж байв.
Харин энэ бүхний хариуд С.Амармандах “Та нар “Gem palace” эздээс нь асуух хэрэгтэй. Эдийн засаг хямралтай, хүмүүсийн амьдрал хүнд байгааг бүгд мэдэж байгаа. Гэхдээ би тэгж хүнд гай болж, хүний эд хөрөнгийг дээрэмдэж явдаг хүн биш” хэмээн мэдэгдэж байв.
Тэгвэл тэрбээр хэл ам болоод байсан тус баараа саяхан Болдоо гэх залууд 1,8 тэрбум төгрөгөөс зарсан сурагтай.
