Баян-Өлгий аймгийн Өлгий сумын 12 дугаар багийн нутаг дэвсгэрт өнгөрсөн шөнө 12.00 цагийн орчимд Daewoo маркийн том оврын ачааны машин онхолдсоны улмаас 3 хүн амиа алдлаа.
Тухайн ачааны машин нь Улаанбаатар хотоос ачаа тээвэрлэж ирсэн ба Шар нуурын даваанаас гарч аймгийн төв орохоор даваанаас уруудах явцдаа жолоодлого алджээ. Улмаар хотын төв рүү 2 км орчим орж, “Дэлүүн” зоогийн газрыг мөргөж унасан байна.
Аймгийн Онцгой байдлын газраас өгсөн мэдээллээр ослын улмаас 3 хүн нас барж, нэг хүн биеийн байдал нь хүнд байдалтайгаар эмнэлэгт хүргэгдсэн.
“Онцгой байдлын байгууллага ослын тухай дуудлагыг 12.37 цагт хүлээж авсан. Дуудлагын дагуу алба хаагчид очиход 150 мкв талбайтай объект бүхэлдээ нурсан байдалтай байсан ба 3 иргэн дарагдсан байж болзошгүй гэсэн мэдээллийг Цагдаагийн байгууллага болон иргэд өгсөн. Үүний дагуу 15 метр урттай хонгил гаргаж бэхэлгээ хийж аврах ажиллагаа явуулсан. Эхний нэрвэгдэгч 40 настай эрэгтэй С-г 04.00 цагт, хоёр дахь нэрвэгдэгч 37 настай эмэгтэй А-г 04.30 цагт, гурав дахь нэрвэгдэгчийг 04.45 цагт байшингийн дээврийг цоолж гаргаж авч хууль хяналтын байгууллагад шилжүүлэн өгсөн” гэдэг мэдээллийг аймгийн Онцгой байдлын газраас өгөв.
Одоо зам тээврийн осол болсон газрыг цагдаа, онцгой байдлын алба хаагчид хамгаалалтад авч, мөрдөн шалгах ажиллагаа явуулж байна.
