Л.Чинбат зөвшөөрөлгүй, хууль бусаар 300 гаруй адууг Сэлэнгэ аймгийн Цагааннуур сумын нутагт оруулж ирснийг төрийн албан хаагчид болон нутгийн иргэд эсэргүүцсэн бичлэг цахим орчинд цацагдаад удаж буй. Хэдийгээр уг хэрэг шийдэгдээгүй байгаа ч бичлэгийг цахим орчинд байрлуулсан залууг дахин өөр гэмт хэрэгт буруутгасан байна.
Тодруулбал, Сэлэнгэ аймгийн Цагааннуур сумын багийн дарга Б.Ганзоригийг “Гацуур” ХХК-ийн ажилтны хурууг хугалсан, “Гацуурт” ХХК-ийн захирлын нэр төрд халдаж, мөргөөгүй байхад мөргөсөн гэдэг худлаа мэдээллийг цахим орчинд тараасан гэх хоёр зүйл ангиар яллагдагчаар татсан байна. Тэгвэл эдгээр хэрэг дээрээс нэмээд өнөөдөр түүнд дахин хэрэг нээж байгаа бололтой. Түүнийг өнөөдөр ирж өргөдөлтэй танилц хэмээн шүүхээс дуудсан байна.
Өөрөөр хэлбэл , Сэлэнгэ аймгийн Цагааннуур сумын багийн дарга Б.Ганзоригийг бичлэг дэлгэсний төлөө эрүүгийн хоёр хэрэг дээр нь нэмээд иргэний хэргийн шүүхийн нэг хэрэг нээж байгаа ажээ.
Л.Чинбатад даруулсан хоёр малчин дайруулаагүй хэмээн мэдүүлгээсээ буцсан тул тэдэнд Сэлэнгэ аймгийн шүүхийн шинжилгээний хэлтэст дахин шинжилгээ хийхээр болсон гэх албан бус мэдээ байна.
Л.Чинбат хүн дайрсан, дайраагүй хүн санаатайгаар алахыг завдсан гэх хэрэг нь хэрэгсэхгүй болох боломжгүй юм. Өөрөөр хэлбэл бичлэг дээр хүн дайрахыг завдаж байгаа нь тодорхой байгаа тул хэргийг хэрэгсэхгүй болгох боломжгүй гэдгийг хуульчид тайлбарлаж байгаа.
Харин бичлэг дэлгэсэн хүнийг ийнхүү залхаан цээрлүүлж байгаа нь гэрч, хохирогчийг хамгаалах тухай хууль хангалтгүй байгааг илтгэж байна.
