Аймшигт осолд өртсөн гэр бүлд туслах хандивын дансаар залилан хийжээ
Архангай аймагт болсон аймшигт ослын улмаас галын аюулд өртөж эцэг, охиноо алдсанаар барахгүй өдгөө 04 сартайгаас 13 хүртлэх насны гурван хүүхэд нь ээжтэйгээ хамт үхэл амьдралтай тэмцэж буй хэцүү цаг мөчид тэдэнд туслах хандивын данс нээж, монголчууд тусламжийн гараа сунгаж эхэлсэн.
Гэтэл нэгэн гэр бүлийн амьдрал сүйрэх дээрээ тулж, олон хүний амь насны тухай асуудал яригдаж байгаа энэ үед луйварчид ч бас зүгээр суугаагүй бололтой.
Айхтар осол, галд өртсөн гэр бүлийн эмчилгээнд зориулагдсан хандивын аяныг иргэд дэмжиж, олон нийтэд түгээж байхтай зэрэгцээд дансны дугаарыг өөрчилж, залилан хийсэн хэрэг гарчээ. Одоогийн байдлаар, хоёр ч хүн хандивын мэдээлэл дээр дансны дугаарыг нь сольж тавиад мөнгө авсан нь илэрч. Үхэл, хагацлаар далимдуулж мөнгө залилсан хүмүүс нь 30 гаруй насны идэр залуус байгаа нь харамсалтай.
Биеийн байдал нь хүнд байгаа байгаа гэр бүлийнхэн ойрын хугацаанд БНСУ руу эмчилгээнд явахаар болсон ийм хэцүү үед хандивын мөнгөө луйварчдад алдах ямар олиг байхав. Тиймээс тэдэнд туслахаар хандив өргөж, мөнгөн дүнтэй шилжүүлэг хийхдээ Очбаярын Цэнгэл гэдэг нэрийг сайтар лавлахыг холбогдох байгууллагаас нь сануулжээ.
