Соёлын сайд Ч.Номин өнгөрсөн долоо хоногт УИХ-ын гишүүн болон нэр хүндтэй бизнесийнхэнд төмс тэргүүтэй хүнсний ногоо тараасан “хэрэг” олны анхаарлын төвд өртөв. Өнгөрсөн жилүүдэд “Гацууртаас” гэсэн шошготой ийнхүү төмс, ногоо тараадаг байсныг эрхэм сайдын дагагчид нь андахгүй. Харин энэ жил “Соёлын сайд Ч.Номингоос” хэмээн шошгоо сольсон нь асуудал үүсэх нөхцөл болгоод байгаа юм.
Тэгвэл Соёлын сайдын нөхөр Г.Бат-Эрдэнэ буюу Батка өөрийн цахим хуудаснаа “Төмсөн дээр албан тушаалаа бичнэ гэдэг бол буруу. Маш буруу. Яагаад ийм алдаа гаргав? Дахиж ийм ичмээр алдаа гаргахгүйн тулд шийдвэр гаргалтын процессынхоо доголдлыг олж залруулах ёстой. Харин хүний нөхрийн хувьд хань ижлээ зөв ч бай буруу ч бай өмөөрмөөр л санагдаад байдаг юм байна. Тэр их хэцүү юм. Би гэхдээ тэснэ ээ” гэжээ.
Түүний энэхүү постын дор “эхнэрийнхээ албан тушаалаар шоглоом хийн хадмынхаа бизнесийг дорд үзсэн хэрэгт орж хөөгдөх вий” гэсэн болгоомжлолыг найзууд нь сануулжээ.
