Фантастик продакшны залууст ганц “хүлээн зөвшөөрөгддөг” бүсгүй бол залуу жүжигчин Б.Одончимэг. Тэрээр “Гэрлэн дохио”, “Аз жаргалын шок”, “Том толгойтын романс”, “247 градус”, “Буруу өрөг”, “37-р точка” зэрэг тайз, дэлгэцийн олон арван бүтээлд эерэг, эсрэг дүр бүтээж, дүр бүхнээ үзэгчдийн сэтгэлд хоногштол амилуулсан.
Тэрбээр эдүгээ Улсын драмын эрдмийн театр хэмээх их айлын алтан тайзыг залуу нас, гоо үзэсгэлэнгээрээ чимж, уран чадвараараа үеийнхнээ хошуучлан, гялалзаж яваа уран бүтээлч юм.
Б.Одноо найзуудын хүрээлэл ихтэй ч тэднээсээ таван бүсгүйг онцолж нөхөрлөдөг. Түүний нөхөрлөлд үсчин манекур, иогчин, бүжигчин, артист гээд тал бүрийн мэргэжилтэй “охид” байдаг аж. Түүний хувьд нэгдүгээрт театр, хоёрдугаарт гэр бүл, гуравдугаарт найзууд багтдаг гэсэн.
Аавынхаа хүсэл мөрөөдлийг биелүүлэх гэж жүжигчин болсон Б.Одноо том хүүхдээ нэг сартай, бага хүүхдээ гурван сартай байхад ажилдаа оржээ.
Бүсгүйчүүдэд хандаж тэрээр “Уг нь нас нь залуу юм. Гэхдээ дөчин настай гэмээр харагдаж байна гэж битгий хэлүүлээрэй. Эмэгтэй хүн өөртөө хайртай, гоё, сайхан байх хэрэгтэй. Брэнд өмсөөгүй ч цэвэрхэн хувцаслаж өөртөө итгэлтэй алхацгаая. Дан ганц харагдах байдал биш тархиа цэнэглэж, зорилго тэмүүлэлтэй, аз жаргалтай амьдраарай” гэж захидаг гэсэн.
