Н.Учрал гишүүн аавынхаа ээж, Н.Норжмаа эмээ дээрээ очжээ.
Тэрээр эмээтэйгээ уулзсан сэтгэгдэлээс цахим хуудаснаа “Намрын сарын билэгт сайн өдөр Хэнтий аймгийн Батширээт суманд суух буурал эмээдээ очиж золголоо. Аавын минь ээж, Н.Норжмаа гэж 88 нас сүүдэр зооглож буй ажилсаг,
хөдөлмөрчөөрөө нутаг орондоо алдартай буянтай сайхан хөгшин байдаг юм. 3 насанд нь аав нь хэлмэгдүүлтэнд өртөж өнчирч хоцорсон эмээ маань их хөдөлмөрийн үр шимээр үр хүүхдээ өсгөж өндийлгөжээ. Аавын минь хөдөлмөрч, тууштай чанар түүнээс улбаатай. Түүнд паалантай жорлон, паартай байшин чухал биш нутаг усандаа дүнзэн байшиндаа суух нь хамгийг том жаргал гэж тэр үргэлж хэлэн хот орохоос зайлсхийдэг нь гэм биш зан нь.
Өнгөрсөн нэг жил өвдөж зовж эмээгийнхээ сэтгэлийг чилээж 1 жил гаруй уулзаагүй удсан хүүгээ баярын нулимстай угтсан агшин сэтгэл дүүргэж өглөө. Ажил, мөнгө яах вэ? Биеэ бодоо миний хүү хэмээн хүүдээ хэлэх үгс нь, эх Монгол нутгаа бахархан дуулах аялгуу нь, рашаанаар нүүрийг минь илбэх, судраар адислах чин сэтгэл нь, нойрноосоо сэрвэлзэж эрхээ эргүүлж мааниа унших ерөөл нь надад эрч хүч, энергийг өглөө. Хүний ертөнцийн мөн чанарыг илүү ухаарч холыг зорих тэнхээг авлаа. Буурал эмээ минь зуу наслаж зургаадай таягаа тулаарай” гэв.
