“Аав” киноны гол дүрээр үзэгчдийн танил болсон жүжигчин Б.Мөнхдэлгэр өдгөө найзуудтайгаа хамтран “Blah blah” гэх хөгжилтэй бичлэгээ цахим орчинд цацаж, “Чи Why ийм хөөрхөн юм бэ дулаакаа” гэх үгтэй дуу нь чамгүй их хандалт аваад байгаа билээ.
Тэрээр өөрийн цахим хуудсаа идэвхитэй хөтөлдөг. Хүүхэд, залууст үлгэр дууриалал болж, нийгэмд эерэг хандлага түгээж буй тэрээр сүүлийн үед ингэж гангалдаг болжээ.
Сонирхуулахад тэрээр СУИС-ийн Театр урлагийн сургуулийн гуравдугаар дамжааны оюутан байхдаа “Аав” кинонд багш нараасаа нууцаар тоглож байжээ. Тэрээр энэ тухайгаа “Дүрээ судлах хангалттай хугацаа надад байгаагүй. Ер нь манай жүжигчид дүрээ хангалттай судалж, өөрийгөө бэлдэж чадалгүй кинонд тоглодог. Тиймээс би монгол жүжигчдийг чадвартай гэж боддог. Харин тухай дүрийн байгаа байдал, зан төлөв нь надтай төстэй байсан. Гэхдээ би аавыгаа багадаа алдсан учраас энэ хайрыг мэдрээгүй, яаж эрхэлдгийг сайн мэдэхгүй байсан. Энэ бүхэнд найруулагч Д.Эрдэнэбилэг, гол дүрийн жүжигчин Ц.Цэрэнболд ах хоёр их тусалсан. Чадахгүй мэдэхгүй байгаа зүйлдээ би шантраагүй. Зүгээр л нүдээ аниад, гүнзгий амьсгаа аваад бүхнийг шинээр эхэлсэн. Жүжигчин хүн тухайн хэсэгт амилах хэрэгтэй гэж багш нар минь сургасан. Тиймээс би аавыгаа яаж хайрлах вэ гэдгийг амьдрал дээрээ сайн мэдэхгүй ч дүрээрээ илэрхийлэхийг хичээсэн.
Ер нь тухайн жүжигчний бүтээж буй дүр болгон нь хувь хүнтэй нь адилхан байна гэж байхгүй. Харин түүнийг яаж өөрөө юм шиг илэрхийлэх вэ гэдэг жүжигчин хүний ур чадвар. Мөн би төрж байгаагүй учраас намайг сорьсон хэсэг байв. Яг өвдөөд машинд явж байдаг кадр дээр би маш том алдаа гаргасан. Машинд явж байхдаа орилоод байлаа.
Тэгсэн Ц.Цэрэнболд жүжигчин “Монгол эмэгтэй хүн төрөхдөө ингэж орилдоггүй юм. Сэтгэлийн хаттай, тэвчээртэй хүмүүс” гэж хэлсэн. Тухайн үедээ би мэдэхгүй болохоор гэж өөрийгөө өмөөрч байсан ч саяхан ээж болоод бүгдийг олйгосон. Хэр барагтай тэгж орилохгүй, үсээ зулгааж газар мөлхдөг юм билээ. Би 32 цаг өвдсөн гэхэд огт уйлаагүй. Төрснийхөө дараа дүрээ буруу гаргажээ гээд өөрийгөө чамласан” гэжээ.
