Тэр уран бүтээлдээ хахаж, галзуурч, шатаж үхлийн муугаар үхэж үзсэн цорын ганц ээж. Эмэгтэй хүн бусдын нүдэнд сайн, муу, сайхан, муухай харагдаж болох ч амьдралынхаа эцсийн мөчид үрийнхээ төлөө чадах бүхнээ хийж, амь тавьдаг гэдгийг тэр л бидэнд ойлгуулдаг. Өдгөө 78 настай тэрбээр мэргэжилдээ чин сэтгэлээ зориулж, хэний ч зориглож, бүтээж чадаагүй дүрүүдийг “амилуулж”, олон улсын кино наадмын тэргүүн шагналуудыг хүртсэн нэгэн юм.
Түүнийг бүтээсэн дүрүүд залуу уран бүтээлчдэд чирэгдэх байтугай бараг чирээд байгааг урлагийнхан ярьдаг. Сүүлийн үед тоглож буй кинонууд нь чанартайн дээр маш хүнд хүнд натур зураг авалтаар хийгдэж буй харагдана. Дарс удах тусам чанарждаг гэдэг шиг Борхүү гуай улам тод гялалзсаар.
Тэрбээр “Хөхөө” кинонд 90 гаруй настай хэвтэрт орчихсон, бурхан болох гээд чадахгүй зовж байгаа ээжийн дүрийг бүтээдэг. Энэ дүрд тоглож байхдаа маш их зовсон тухайгаа тэрбээр нэгэн хэвлэлд ярьжээ. Тэрбээр “Удаан хэвтэрт орсны улмаас нуруу, сүүж нь цоорчихсон ээжийн дүр бүтээхийн тулд найман цаг будгаар шарх, сорви хийлгэсэн. Дараа нь ядарсан царай, хацрын хонхорхойг гурван цаг хэвтэж хийлгэсэн. Тэгээд л үргэлжлүүлээд кино зураг авалтад орсон доо. Их хэмжээний будагт орсон болохоор хөдлөх л юм бол будаг нүүх, ховхорох зэргээр муухай болчих гээд намайг их чилээсэн дээ. Идэж, уухаа хүртэл хязгаарласан. Бусдын чөлөөтэй хөдөлж байгааг харж атаархаад л хэвтдэг байлаа. Би хэвтэрт орсон хүний дүрд тоглож байгаа болохоор бусдын зургийг авч байхад ч хэвтэж л байдаг байсан. Сүүлдээ жинхэнээсээ ядарсан даа. Гэвч миний ажил, мэргэжил болохоор тэсэхээс өөр аргагүй шүү дээ. Олон цаг хэвтэж кинонд тоглож байгаагүй болохоор туршлагагүйтсэн байна лээ. Би хожуу живхтэй ирдэг байж дээ гэж бодсон шүү. Тиймээс тус энэ дүр уран бүтээлийн маань сор нь” хэмээн онцолжээ.
