Хөтөл “Цемент шохой” ТӨХК-ийн гүйцэтгэх захирал Л.Наранбаатар сонгуульд нэр дэвших гэж байгаа тул шинэ оны өмнөхөн ажлаа өгсөн билээ. Тэгвэл түүний албан тушаалд УИХ-ын гишүүн асан Л.Эрдэнэ-Очир томилогдож байгаа ажээ. Л.Наранбаатар өнөөдөр ажлаа хүлээлгэн өгөх бол УИХ-ын гишүүн асан Л.Эрдэнэ-Очир ажлаа хүлээн авах юм.
Л.Эрдэнэ-Очирын хувьд үйлдвэрийн техникийн бэлэн байдал маш муу, түлш түүхий эд, татварт хэдэн тэрбум төгрөгийн өртэй, цалингаа тавьж чадахгүй байдалд хүрсэн үйлдвэрийг хүлээн авч байна.
Тэгвэл шинэ дарга ирэхтэй зэрэгцэн Хөтөл “Цемент шохой” ТӨХК-ийн шохойн нөөцтэй холбоотой мэдээлэл ил болж байна. Тодруулбал, Хөтөл “Цемент шохой” ТӨХК технологийн буюу Эрдэнэт үйлдвэрт нийлүүлдэг шохой, барилгын буюу хөнгөн блок зэрэгт ашиглагддаг шохойн нөөцийн мэдээлэл ил гарлаа.
Л.Наранбаатарыг ажлаа өгөхөөс өмнөхөн 2023.12.01-ны байдлаар технологийн шохой 977 тонн байсан бол энэ оны нэгдүгээр сарын нэгний байдлаар 170 тонн болжээ. Энэ нь Эрдэнэт үйлдвэрт нийлүүлэх шонхойн нөөц бөгөөд дууссан гэж ойлгож болно. Харин үүнийхээ оронд Эрдэнэт үйлдвэрийн технологид нийцэхгүй барилгын шохойн нөөцийг бусдад хангалтай нөөцтэй мэтээр худал мэдээлэлэж байсан цаг саяхан билээ.
Тэгвэл ингэж ажлын хариуцлага алдсан явдал нь Хөтөл “Цемент шохой” ТӨХК-ийн Ерөнхий инженер, технологи бодлогын хэлтсийн дарга, геологи уул уурхайн хэлтсийн дарга, сорилт шинжилгээ лабораторийн дарга, шохойн үйлдвэрийн дарга нарын хариуцлагагүй байдалтай шууд холбоотой юм.
