Монголын нисгэгч нар Францад нэгнийхээ хоолойг хэрчих шахсан гэв үү

МИАТ ХК-ийн “БОИНГ-767” агаарын хөлгийн нисэх багийн гишүүд Францын Парис хотод согтууруулах ундаа хэтрүүлэн хэрэглэсний улмаас нэгнийхээ хоолойг хутгаар гэмтээсэн гэх мэдээлэл бидэнд ирлээ. Тус улс дахь “SIM AERO” сургалт дадлагын төвд дадлага сургуулилалт хийж байсан МИАТ-ын дээрх хөлгийн ахмад, Гавьяат нисгэгч цолтой Б.Асет гэх 60 эргэм насны эр хоёрдугаар нисгэгч Б.Баясгалан гэх 25-26 орчим настай залууд халдсан гэнэ. Энэ сарын 20-21-нд шилжих шөнө болсон уг явдлын дараа Францын хууль сахиулагчид Б.Асетыг цагдан хорьж, Б.Баясгаланд эмнэлгийн яаралтай тусламж үзүүлэн мэс засал хийсний дүнд амийг нь аварчээ. МИАТ, ИНЕГ-ын эх сурвалжууд “Ийм явдал болсон гэсэн мэдээлэл бидэнд ирсэн. Гэхдээ ихэд нууцалж байгаа. Тухайн үйл явдалд оролцсон гэх нисэх багийн ахмад, хоёрдугаар нисгэгч нар энэ сарын 25-нд эх орондоо ирсэн. Халдлагад өртөж хохирсон залуу нь хоолойгоо боочихсон, нүүрэнд нь үүссэн бусад сорви, хөхрөлт арилаагүй явсныг харсан манай ажилтнууд бий” хэмээсэн юм. Тэгвэл МИАТ ХК-ийнхан “Хоёр нисгэгч хоорондоо зодолдсон асуудал гарсан. Гэхдээ хутга, мэсэндээ хүрээгүй. Тэдэнд хариуцлага тооцож, нислэгт гаргахаа больсон” гэж буй. 

Тэдний архи уух болсон шалтгаан нь Монголоос МИАТ ХК-ийн нисгэгч А.Энхжаргал тэргүүтэй гурван хүн Францад очсоноос үүдэлтэй. Тэр үеэр дээрх сургалт дадлагын төвд дадлагажсан нэр дурдсан хоёр нисгэгч сургуулилалтаа дуусаж таарчээ. Улмаар манай улсын таван нисгэгч нийлж согтууруулах ундаа хэрэглэсний уршгаар ийнхүү нэгнээ хүнд гэмтээсэн аж.
МИАТ ХК-ийн нисгэгч нарын хувьд сахилга бат султай, мансууруулах бодис хэрэглэсэн, хоорондоо зодолдсон, ажлын бус цагаар зугаалж яваад нэг нь усанд осолдсон, жижиг оврын онгоцтойгоо осолдсон, ажлаа хийж байхдаа ч чадвар муутай, Хятадын нисэх буудалд нисгэгч нь онгоцоо суулгаж, хөөргөж чадахгүй байсан гэх мэт үйлдэл шил шилээ даран гаргадаг ч дийлэнхийг нь нуун дарагдуулдаг юм. Мөн дээр нэр дурдсан А.Энхжаргал ачаа тээврийн хөлөг жолоодон ХБНГУ-аас гарч, Польшийн нутаг дэвсгэр дээгүүр холбоондоо хариу өгөлгүй удаан хугацааны турш нисэж, тус улсын агаарын цэргийн хүчнийхэн устгах тушаал өгч, сөнөөгч онгоцоо хөөргөж байсан удаатай.
Энэ мэт нислэгийн аюулгүй ажиллагаа зөрчигдсөн үйлдлүүдийг ИНЕГ, тэр дундаа тус газрын Нислэгийн аюулгүй ажиллагаа, хяналт зохицуулалтын албаныхан хянан шалгаж байх учиртай. Гэвч тус албаны дарга Ц.Бат нь хүүхдээ МИАТ-д нисгэгч болгосон, ашиг сонирхлын зөрчилтэй учраас яаж ч чаддаггүй гэж хардахад хүргэж байна. Уг нь бол иргэний нисэхийн салбарт дагаж мөрддөг “Нислэгийн аюулгүй ажиллагааг хангах удирдлагын тогтолцоо” гэх бичиг баримтад аюулгүй ажиллагааны талаар тодорхой дурдсан ч манайхан мөрддөг, эсэх нь эргэлзээтэй.
Хэрэв агаарын хөлгийн ахмад нь хоёрдугаар нисгэгчээ хутгалсан үйл явдал нислэгийн үед тохиолдсон бол юу болох байсныг төсөөлөхөд бэрх. Олон хүний амь дээсэн дөрөөн дээр дэнжигнэх байсан нь гарцаагүй.